దిగ్గజ క్రికెటర్ సచిన్ తెందుల్కర్‌ను తొలిసారి కలిసినప్పుడు దేవుడితో కరచాలనం చేసినట్లు అనిపించిందని టీమ్‌ఇండియా మాజీ ఆల్‌రౌండర్‌ యువరాజ్‌సింగ్‌ అభివర్ణించాడు. అంతర్జాతీయ క్రికెట్‌కు యువీ వీడ్కోలు పలికి బుధవారానికి ఏడాది పూర్తయింది. ఈ సందర్భంగా సచిన్.. యువరాజ్‌ను గుర్తు చేసుకుంటూ, అతడిని తొలిసారి చెన్నై శిక్షణా శిబిరంలో చూశానని, అప్పుడే అతడి శక్తిసామర్థ్యాలు గుర్తించానని ఓ ట్వీట్‌ చేశాడు. స్పందించిన యువీ.. లిటిల్‌ మాస్టర్‌ను తాను తొలిసారి కలిసిన అనుభవాన్ని అభిమానులతో పంచుకున్నాడు.
'ధన్యవాదాలు మాస్టర్. మనం తొలిసారి కలిసినప్పుడు, నేను దేవుడితో కరచాలనం చేసినట్లు అనిపించింది. నేను కష్టాల్లో ఉన్నప్పుడు ముందుకు నడిపించావు. నా శక్తి సామర్థ్యాలపై నమ్మకం కలిగించావు. మీరు నాతో ఎలా ఉన్నారో.. నేనూ యువకులతో అలానే ఉన్నా. మీతో మరిన్ని మధురజ్ఞాపకాలు పంచుకోడానికి ఎదురుచూస్తుంటా' అని యువీ రీట్వీట్‌ చేశాడు. అంతకుముందు సచిన్ ట్వీట్‌లో.. 'నిన్ను తొలిసారి చెన్నై శిక్షణ శిబిరంలో చూశా. అప్పుడు నేను నీకు సాయం చేయలేకపోయా. అయితే, నీ వేగం, చురుకుదనం, అథ్లెటిక్‌ శరీరం తదితర అంశాలను అప్పట్లోనే గుర్తించా. సిక్సర్లు కొట్టే నీ సామర్థ్యం అద్భుతం. ఏ మైదానంలోనైనా బంతిని స్టాండ్స్‌లోకి పంపించగలనని ప్రపంచానికి చాటి చెప్పావ్' అని పేర్కొన్నాడు.