నెట్స్​లో యూవీ సాధన.. సిక్స్​తో సందడి

టీమ్ఇండియా మాజీ క్రికెటర్ యువరాజ్ సింగ్ మళ్లీ బ్యాట్ పట్టాడు. శనివారం అతడి పుట్టినరోజు సందర్భంగా నెట్స్​లో సాధన చేస్తూ కనిపించాడు. ఈ వీడియోను నెట్టింట పోస్టు చేస్తూ పుట్టినరోజు శుభాకాంక్షలు తెలిపిన వారందరికీ ధన్యవాదాలు తెలిపాడు.

టీమ్‌ఇండియా మాజీ ఆల్‌రౌండర్‌ యువరాజ్‌ సింగ్‌ శనివారం 39వ పుట్టినరోజు జరుపుకొన్నాడు. ఈ సందర్భంగా అతడికి తోటి క్రికెటర్లు, అభిమానుల నుంచి శుభాకాంక్షలు వెల్లువెత్తాయి. అయితే, నూతన వ్యవసాయ చట్టాలకు వ్యతిరేకంగా ప్రస్తుతం రైతులు చేస్తోన్న ఆందోళనలు సద్దుమణగాలని, ప్రభుత్వంతో వారి చర్చలు ఫలప్రదం కావాలని కోరుతూ ఈసారి తన జన్మదిన వేడుకలకు దూరంగా ఉంటున్నట్లు ఒక ప్రకటనలో తెలిపాడు. ఈ నేపథ్యంలోనే శనివారం రాత్రి ఇన్‌స్టాగ్రామ్‌లో మరో వీడియో పంచుకున్న అతడు నెట్స్‌లో తనకిష్టమైన బ్యాటింగ్‌ చేస్తూ కనిపించాడు.

పుట్టినరోజు నాడు యూవీ నెట్స్‌లో సాధన‌ చేశాడు. బ్యాట్‌పట్టి మళ్లీ షాట్లు ఆడాడు. ఈ సందర్భంగా బౌలర్‌ తలపై నుంచి బాదిన ఓ సిక్సర్‌ వీడియోను స్లో మోషన్‌లో చూపిస్తూ అభిమానులతో పంచుకున్నాడు.

"కొత్త సంవత్సరంలోకి వెళ్లడం అద్భుతంగా ఉంది. మళ్లీ ఆటలో మునిగిపోవడం సంతోషంగా అనిపిస్తుంది. మనకు ఇష్టమైన వాటికి దూరంగా ఉండటం ఎలా ఉంటుందోనని తెలుసుకోవడం కొన్నిసార్లు చాలా ముఖ్యం. మీ అందరి ప్రేమాభిమానాలు, శుభాకాంక్షలకు ధన్యవాదాలు"

-యువరాజ్, టీమ్ఇండియా మాజీ క్రికెటర్

2000 ఏడాదిలో దాదా కెప్టెన్సీలో భారత జట్టులోకి వచ్చిన యూవీ సుదీర్ఘకాలం రాణించాడు. తన బ్యాటింగ్‌తో ఎన్నో మధుర విజయాలు అందించాడు. టీమ్‌ఇండియా 2007లో టీ20 ప్రపంచకప్‌, 2011లో రెండోసారి వన్డే ప్రపంచకప్‌ గెలవడంలో ముఖ్యభూమిక పోషించాడు. గతేడాది వన్డే ప్రపంచకప్‌ జట్టుకు ఎంపిక చేయకపోవడం వల్ల ఆటకు వీడ్కోలు పలికాడు.