'రోహిత్ శర్మ ఇలా ఉండటానికి ధోనీనే కారణం'

రోహిత్.. స్టార్ బ్యాట్స్​మన్​గా మారడం వెనుక ధోనీ మద్దతు ఉందని చెప్పాడు మాజీ ఆటగాడు గంభీర్. ప్రస్తుతం యువఆటగాళ్లకు, సారథి కోహ్లీ నుంచి అలాంటి అండే కావాలని అభిప్రాయపడ్డాడు.

ప్రపంచ అత్యుత్తమ బ్యాట్స్​మెన్​లో ఒకడిగా రోహిత్ శర్మ ఎదగడానికి గల కారణం ధోనీనే అని చెప్పాడు భారత మాజీ క్రికెటర్ గౌతమ్ గంభీర్. లాక్​డౌన్ కారణంగా ఇంట్లోనే ఉన్న ఇతడు.. ఓ టీవీ ఛానెల్​ లైవ్​చాట్​లో మాట్లాడతూ ఈ విషయాన్ని పంచుకున్నాడు.

"సెలక్షన్ కమిటీ, జట్టు మేనేజ్​మెంట్ ఓ క్రికెటర్​కు మద్దతుగా నిలిచినా, కెప్టెన్ అండ లేకపోతే అవన్నీ నిరూపయోగమే. అంతా సారథి చేతుల్లోనే ఉంటుంది. రోహిత్ శర్మకు ధోనీ చాలాకాలం మద్దతుగా నిలిచాడు.​ మరే ఇతర ఆటగాడికి ఇలా జరుగుండకపోవచ్చు. ప్రస్తుతం యువ ఆటగాళ్లయిన శుభ్​మన్ గిల్, సంజూ శాంసన్​లకు కెప్టెన్ కోహ్లీ అండగా నిలిచి, అవకాశాలివ్వాలి" -గౌతమ్ గంభీర్, టీమిండియా మాజీ క్రికెటర్

భారత మాజీ కెప్టెన్ ధోనీతో రోహిత్ శర్మ

2007లో అంతర్జాతీయ క్రికెట్​లో అరంగేట్రం చేసిన రోహిత్ శర్మకు కొన్నేళ్లపాటు సరైన గుర్తింపు దక్కలేదు. అయితే 2013లో, ధోనీ సూచనతో రోహిత్​కు ఓపెనర్​గా అవకాశమిచ్చింది మేనేజ్​మెంట్​. అప్పటి నుంచి అద్భుతంగా రాణిస్తూ, జట్టు విజయాల్లో కీలక పాత్ర పోషిస్తున్నాడు హిట్​మ్యాన్. ఇప్పటివరకు వన్డేల్లో మూడు ద్విశతకాలు చేసి, ఎవరికీ సాధ్యం కానీ రికార్డును నెలకొల్పాడు.