కోహ్లీ, రోహిత్​ను ఔట్​ చేసేందుకు అంపైర్ సలహాలు​!

ఈ ఏడాది ప్రారంభంలో జరిగిన వన్డేలో కోహ్లీ-రోహిత్​ జోడీని విడదీసేందుకు ఏకంగా అంపైర్​ సలహాలు కోరాడు ఆస్ట్రేలియా కెప్టెన్ ఫించ్. ఈ విషయాన్ని సదరు అంపైర్ ఇటీవలే ఓ ఇంటర్వ్యూలో వెల్లడించారు.

టీమ్​ఇండియా ఆటగాళ్లు విరాట్​ కోహ్లీ, రోహిత్ శర్మలు బ్యాటింగ్​​లో ఎవరికి వారే సాటి. వీరిద్దరూ బరిలో దిగితే ప్రత్యర్థి జట్టులో కలవరం మొదలవడం ఖాయం. అలాంటి పరిస్థితే ఈ ఏడాది ఆరంభంలో ఆస్ట్రేలియా కెప్టెన్​ ఆరోన్​ ఫించ్​కు ఎదురైంది. జనవరిలో బెంగళూరు వేదికగా జరిగిన వన్డేలో కోహ్లీ, రోహిత్​ విజయవంతమైన భాగస్వామ్యాన్ని నెలకొల్పారు. ఈ క్రమంలో వీరిని ఔట్​ చేసేందుకు సలహ ఇవ్వమని, ఆ మ్యాచ్​లో అంపైరింగ్ చేస్తున్న మైకేల్ గాఫ్​ను కోరాడు. ఈ విషయాన్ని తాజాగా ఓ ఇంటర్వ్యూలో వెల్లడించారు​ గాఫ్​.

"భారత్​, ఆస్ట్రేలియా మధ్య జరిగిన మ్యాచ్​లో కోహ్లీ, రోహిత్ అద్భుతమైన భాగస్వామ్యం నెలకొల్పడం ఇంకా గుర్తుంది. స్క్వేర్​ లెగ్​లో నిల్చొని అంపైరింగ్​ చేస్తున్నాను. నా పక్కనే ఉన్న​ ఫించ్​.. వారిద్దరిని ఔట్​ చేయడం ఎలా? అని నన్ను అడిగాడు. 'నాకు చేతి నిండా పనుంది. నీ పని నీకుంది' అని నేను జవాబిచ్చాను"

- మైకేల్​ గాఫ్​, అంపైర్​

జనవరిలో బెంగళూరు వేదికగా భారత్​, ఆస్ట్రేలియా మధ్య మూడో వన్డే జరిగింది. ఈ మ్యాచ్​ గురించే అంపైర్​ మైకేల్ గాఫ్ ప్రస్తావించారు. ఆ రోజు కోహ్లీ (89), రోహిత్​ (119) విజయవంతమైన భాగస్వామ్యం నెలకొల్పారు. రెండో వికెట్​కు 137 పరుగుల జోడించారు. ఆసీస్​ నిర్దేశించిన 286 పరుగల లక్ష్యాన్ని టీమ్​ఇండియా 47.3 ఓవర్లలో చేధించింది. ఏడు వికెట్ల తేడాతో చివరి మ్యాచ్​లో విజయం సాధించడమే కాకుండా మూడు వన్డేల సిరీస్​ను 2-1తో భారత్​ గెలుపొందింది.

ఇదీ చూడండి... పక్షి ప్రాణాలు కాపాడటంలో ధోనీకి సాయపడ్డ జీవా