'ఆ పర్యటనకు సూర్యను ఎంపిక చేయాల్సింది'

ఆస్ట్రేలియా పర్యటన కోసం యువ బ్యాట్స్​మన్​ సూర్యకుమార్​ యాదవ్​ను ఎంపిక చేయకపోవడంపై వెస్టిండీస్​ దిగ్గజం బ్రియన్​ లారా స్పందించాడు. ఐపీఎల్​లో ముంబయి ఇండియన్స్​ తరపున ఉత్తమంగా రాణించినా.. ఆసీస్​ పర్యటనకు ఎందుకు ఎంపిక చేయలేదో కారణాలు కనిపించడం లేదని అన్నాడు.

సుదీర్ఘమైన ఆస్ట్రేలియా పర్యటనలో ముంబయి ఇండియన్స్‌ బ్యాట్స్‌మన్‌ సూర్యకుమార్‌ యాదవ్‌ కచ్చితంగా ఉండాల్సిన ఆటగాడని వెస్టిండీస్‌ దిగ్గజం బ్రియన్‌ లారా అభిప్రాయపడ్డాడు. తాజాగా క్రికెట్‌ కనెక్టెడ్‌ కార్యక్రమంలో మాట్లాడిన మాజీ క్రికెటర్‌ ఈ యువ బ్యాట్స్‌మన్‌ను ప్రశంసలతో ముంచెత్తాడు. అతడో క్లాస్‌ ప్లేయర్‌ అని, ఆటగాళ్ల ఎంపికలో తాను పరుగులు మాత్రమే చూడనని చెప్పాడు. వాళ్ల నైపుణ్యాలు, ఒత్తిడిలో రాణించే సత్తా, బ్యాటింగ్‌ ఆర్డర్‌లో వచ్చే స్థానాలను బట్టి ఆటగాళ్లను అంచనా వేస్తానన్నాడు. ఈ నేపథ్యంలో ముంబయి బ్యాట్స్‌మన్‌ అద్భుతమైన ఆటగాడని పేర్కొన్నాడు.

"రోహిత్‌, డికాక్‌ తర్వాత సూర్య మూడో నంబర్‌ ఆటగాడిగా బరిలోకి దిగుతాడు. వాళ్లు ఒత్తిడిలో ఉన్నప్పుడు బ్యాటింగ్‌ చేస్తాడు. మూడో స్థానమంటే ఎంతో కీలకం. ఏ జట్టులోనైనా ఆ స్థానంలో ఆడే ఆటగాడు ఎంతో ప్రతిభగల సమర్థుడు. సూర్య కూడా అలాంటి వాడే. ఎంతో నమ్మకమైన ఆటగాడు. ఇక ముంబయి జట్టులో ఆ స్థానానికి అతడు సరైన బ్యాట్స్‌మన్‌. ఆస్ట్రేలియా పర్యటనకు అతడిని ఎందుకు ఎంపిక చేయలేదో ఏ కారణాలు కనిపించడం లేదు."

- బ్రియన్​ లారా, వెస్టిండీస్​ మాజీ క్రికెటర్​

ఇదిలా ఉండగా, సూర్య గత మూడు సీజన్లలో ఈ టోర్నీలో నిలకడగా రాణిస్తున్నాడు. అలాగే దేశవాళీ క్రికెట్‌లోనూ అత్యధిక పరుగులు సాధిస్తున్నాడు. దీంతో ఆస్ట్రేలియా పర్యటనలో తనని ఎంపిక చేస్తారని ఎంతో ఆశించాడు. కానీ సెలెక్టర్లు అతడికి మొండి చేయి చూపించడం వల్ల నిరాశ చెందాడు. ఈ క్రమంలోనే 13వ సీజన్‌ ఆఖర్లో రెచ్చిపోయాడు. కీలక మ్యాచ్‌ల్లో ఆదుకొని రోహిత్‌సేన ఐదోసారి టైటిల్‌ సాధించడంలో కీలక పాత్ర పోషించాడు.