ఆ ఇన్నింగ్స్​ నాకెంతో ప్రత్యేకం: కోహ్లీ

2016 టీ20 ప్రపంచకప్​లో ఆస్ట్రేలియాపై ఆడిన ఇన్నింగ్స్​ తనకు ఎంతో ప్రత్యేకమైనదని టీమ్​ఇండియా కెప్టెన్​ విరాట్​ కోహ్లీ అన్నాడు. బుధవారం స్టీవ్​స్మిత్​తో జరిగిన ముఖాముఖిలో ఈ విషయాన్ని ఆయన వెల్లడించాడు.

ఆస్ట్రేలియాపై తాను ఆడిన అత్యుత్తమ ఇన్నింగ్స్​ గురించి చెప్పుకొచ్చాడు టీమ్ఇండియా కెప్టెన్​ విరాట్​ కోహ్లీ. ఆసీస్​ బ్యాట్స్​మన్​ స్టీవ్​ స్మిత్​తో బుధవారం ప్రత్యేక ముఖాముఖిలో కోహ్లీ ముచ్చటించారు. 2016 టీ20 ప్రపంచకప్​లో ఆసీస్​ జట్టుపై తాను ఉత్తమ ప్రదర్శన కనబరచినట్లు వెల్లడించాడు.

"నాకు ఇష్టమైన ఇన్నింగ్స్​ గురించి చెప్పాలంటే అది నీకు(స్మిత్​) నచ్చకపోవచ్చు. 2016 టీ20 ప్రపంచకప్​లో మొహాలీ వేదికగా ఆస్ట్రేలియాతో జరిగిన మ్యాచ్​లో నేను ఆడిన ఇన్నింగ్స్​ నాకు స్పెషల్​. ఆ సమయంలో నాకు ఏది అర్థం కాలేదు. ట్రాన్స్​మోడ్​లోకి వెళ్లాను. నేను కొట్టే ప్రతి బంతి గ్యాప్​ల ద్వారా బౌండరీలను చేరింది. అలా బ్యాటింగ్​లో స్థిరంగా నిలిచాను. మీరు (ఆస్ట్రేలియా జట్టు) చాలా ఒత్తిడికి లోనయ్యారు. అది నాకు ఎప్పటికీ ప్రత్యేకమే".

- విరాట్​ కోహ్లీ, టీమ్​ఇండియా కెప్టెన్​

మొహాలీ వేదికగా 2016 టీ20 ప్రపంచకప్​లో జరిగిన సెమీఫైనల్​ అర్హత మ్యాచ్​లో ఆస్ట్రేలియా, భారత్​ తలపడ్డాయి. తొలుత బ్యాటింగ్ చేసిన కంగారూ జట్టు నిర్ణీత 20 ఓవర్లలో 160 పరుగులు చేసింది. ఛేదనలో దిగిన భారత జట్టు ఒక దశలో 94 పరుగులకే 4 వికెట్లను కోల్పోయింది. అప్పుడు క్రీజ్​లో ఉన్న ధోనీ, విరాట్​ కోహ్లీ అద్భుతమైన ప్రదర్శనతో జట్టుకు విజయాన్ని అందించారు.

ఆ మ్యాచ్​లో కోహ్లీ 51 బంతుల్లో 82 పరుగులతో నాటౌట్​గా నిలిచి టీమ్​ఇండియాను గెలుపు తీరాలను చేర్చాడు. ఇందులో విజయం దక్కించుకుని భారత జట్టు సెమీ ఫైనల్​లో వెస్టిండీస్​తో తలపడింది.

భారత్​, ఆస్ట్రేలియా మధ్య నాలుగు మ్యాచ్​ల టెస్టు సిరీస్​లో భాగంగా గురువారం తొలి మ్యాచ్​ జరగనుంది. అడిలైడ్​ ఓవల్​లో డే/నైట్​ మ్యాచ్​తో సిరీస్​ ప్రారంభం కానుంది.

ఇదీ చూడండి:టీమ్​ఇండియాకు ఈ రెండు సిరీస్​లు కీలకం!