'ద్రవిడ్​ నాయకత్వానికి సరైన గౌరవం దక్కలేదు'

టీమ్​ఇండియా మాజీ కెప్టెన్​ రాహుల్​ ద్రవిడ్​కు జట్టులో సరైన గౌరవాన్ని ఇవ్వలేకపోయామని విచారాన్ని వ్యక్తం చేశాడు గౌతమ్​ గంభీర్​. సారథిగా జట్టుకు అనేక విజయాలను అందించినా.. అతడ్ని గుర్తించడంలో అందరూ విఫలమయ్యారని తాజాగా వెల్లడించాడు గంభీర్​.

భారత మాజీ దిగ్గజ క్రికెటర్​ రాహుల్​ ద్రవిడ్​కు కెప్టెన్​గా సరైన గౌరవం దక్కలేదని అభిప్రాయపడ్డాడు మాజీ బ్యాట్స్​మన్​ గౌతమ్​ గంభీర్​. జట్టుకు మెరుగైన సేవలు అందించినా.. ద్రవిడ్​ను విస్మరించారని తెలిపాడు. టీమ్​ఇండియాలో సచిన్​తో పోల్చదగిన ప్రభావాన్ని చూపినప్పటికీ దేశంలో ద్రవిడ్​కు తగిన క్రెడిట్​ లభించలేదని తాజాగా వెల్లడించాడు గంభీర్​.

రాహుల్ ద్రవిడ్​

"రాహుల్​ ద్రవిడ్​ నాయకత్వానికి తగిన గౌరవాన్ని ఇవ్వకపోవడం దురదృష్టకరం. మనం సౌరభ్ గంగూలీ, ధోనీ కెప్టెన్సీ గురించి మాట్లాడాం. ఇప్పుడు విరాట్​ కోహ్లీ సారథ్యం గురించి చర్చించుకుంటున్నాం. కానీ, టీమ్​ఇండియాకు అద్భుతమైన నాయకుడిగా వ్యవహరించిన రాహుల్​ ద్రవిడ్​ను గుర్తించలేకపోయాం. ఆయన రికార్డులను గమనిస్తే ద్రవిడ్​ను క్రికెటర్​గా, కెప్టెన్​గానూ చాలా తక్కువగా చూశారని అర్థమవుతుంది. ఇంగ్లాండ్​, వెస్టిండీస్​లతో సహా మరో 14 నుంచి 15 సిరీస్​లను ద్రవిడ్ నాయకత్వంలో గెలుపొందాం".

- గౌతమ్​ గంభీర్​, టీమ్​ఇండియా మాజీ క్రికెటర్​

రాహుల్​ ద్రవిడ్​ కెప్టెన్​గా 79 వన్డేల్లో భారత్​కు ప్రాతినిధ్యం వహించగా.. అందులో 42 విజయాలు ఉన్నాయి. వరుసగా 14 మ్యాచ్​ల్లో ఛేదనలో విజయం సాధించిన ఘనత ద్రవిడ్ సారథ్యంలోనే సాధ్యమైంది. వెస్టిండీస్​, దక్షిణాఫ్రికా, బంగ్లాదేశ్​, ఇంగ్లాండ్​లతో ఆడిన టెస్టు సిరీస్​ల్లో జట్టుకు గెలుపును అందించాడు.

ద్రవిడ్​ తన అంతర్జాతీయ కెరీర్​లో ఆడిన 164 టెస్టుల్లో 13,288 పరుగులు చేయగా.. 344 వన్డేల్లో 10,889 రన్స్​ను నమోదు చేశాడు. 2016 నుంచి 2019 వరకు అండర్​-19, భారత 'ఏ' జట్లకు కోచ్​గా వ్యవహరించాడు. ప్రస్తుతం బెంగళూరులోని జాతీయ క్రికెట్​ అకాడమీకి డైరెక్టర్​గా పనిచేస్తున్నాడు​.

ఇదీ చూడండి...'వార్నర్​కు టాలీవుడ్​లో అవకాశాలు పక్కా వస్తాయి'