రాహుల్​తో ఆరోగ్యకరమైన పోటీ: ధావన్

పుణె వేదికగా శ్రీలంకతో మూడో టీ20 విజయానంతరం టీమిండియా ఓపెనర్ శిఖర్ ధావన్ మాట్లాడాడు. కేఎల్ రాహుల్​తో తనకు ఆరోగ్యకరమైన పోటీ ఉందని తెలిపాడు.

గాయంతో జట్టుకు దూరంగా ఉండటం.. నిలకడలేమితో ప్రదర్శన చేయలేకపోవడం లాంటి కారణాలతో టీమిండియా ఓపెనర్ శిఖర్ ధావన్ స్థానంపై అనుమానం రేకెత్తింది. ఇదే సమయంలో కేఎల్ ​రాహుల్ సత్తాచాటుతుండటం వల్ల ధావన్ పని అయిపోయినట్లే అనుకుంటున్నారు క్రీడా ప్రేక్షకులు. అయితే ఈ అంశంపై స్పందించిన గబ్బర్.. తమ మధ్య ఆరోగ్యకరమైన పోటీ ఉందని, క్రికెట్లో ఇది చాలా అవసరమని అన్నాడు.

"రాహుల్​తో కలిసి ఇన్నింగ్స్ ప్రారంభించడం చాలా ఆనందంగా ఉంది. ఇద్దరం జట్టుకు మంచి ఆరంభాన్నిచ్చాం. గత మ్యాచ్​లోనూ 30 పరుగులతో రాణించా. నా దృష్టిలో అవి కూడా విలువైనవే. ఒక్కసారి క్రీజులో కుదురుకుంటే.. ఎక్కువ పరుగులు చేయొచ్చు. ఈ మ్యాచ్​లో వెంట వెంటనే వికెట్లు కోల్పోయినప్పటికీ 200 పైచిలుకు పరుగులు సాధించాం. మా ఇద్దరి(రాహుల్​తో) మధ్య ఆరోగ్యకరమైన పోటీ ఉంది. మేము మంచి స్నేహితులం." -శిఖర్ ధావన్, టీమిండియా ఓపెనర్

పుణె వేదికగా శ్రీలంకతో జరిగిన మూడో టీ20లో భారత్​ ఘన విజయం సాధించింది. టీమిండియా ఇచ్చిన 202 పరుగుల లక్ష్యాన్ని ఛేదించలేక 123 రన్స్​కే చేతులెత్తేశారు లంకేయులు. ఫలితంగా 78 పరుగుల తేడాతో గెలుపొందింది కోహ్లీ సేన. ఈ మ్యాచ్​లో ధావన్ 36 బంతుల్లో 52 పరుగులు చేసి పాత గబ్బర్​ను గుర్తు చేశాడు. రాహుల్ 54 పరుగులతో మరోసారి అదరగొట్టాడు.

ఇదీ చదవండి: వడాపావ్​, పూరీపై భారత క్రికెటర్ల ముచ్చట్లు