టీమ్ఇండియా ఆల్రౌండర్ రవీంద్ర జడేజా మైదానంలో ఎలా మాయచేస్తాడో అందరికీ తెలుసు. బ్యాటింగ్‌, బౌలింగ్‌తో పాటు ఫీల్డింగ్‌లోనూ అద్భుత విన్యాసాలు చేస్తుంటాడు. జడ్డూ మైదానంలోనే కాకుండా ఇంట్లోనూ అప్పుడప్పుడు విన్యాసాలు చేస్తుంటాడు. ప్రస్తుతం ఇంట్లో ప్రదర్శించిన కత్తి విన్యాసంతో నెటిజెన్లను 'వావ్‌' అనిపిస్తున్నాడు. సహజంగా మైదానంలో అర్ధశతకం, శతకం చేసినప్పుడు జడ్డూ తన బ్యాట్‌ను కత్తి తిప్పినట్లు తిప్పడం మనం ఎన్నోసార్లు చూశాం. అలాంటిదే ఇప్పుడు నిజమైన కత్తితో ప్రదర్శన చేశాడు.
కరోనా వైరస్‌ నేపథ్యంలో ఆటగాళ్లంతా ఇంటికే పరిమితమవ్వగా కొందరు కుటుంబసభ్యులతో హాయిగా జీవిస్తున్నారు. మరికొందరు ఇంట్లో పనులు చేస్తూ బిజీగా ఉంటున్నారు. జడేజా మాత్రం జామ్‌నగర్‌లోని తన ఇంట్లో ఆదివారం కత్తితో విన్యాసాలు చేసి ఆ వీడియోను ఇన్‌స్టాగ్రామ్‌లో అభిమానులతో పంచుకున్నాడు. "కత్తి తన మెరుపును కోల్పోవచ్చు కానీ, గురువు మాటను కాదనదు" అని పేర్కొన్నాడు.