మూడో టెస్టులో ఆడటంపై వార్నర్ స్పష్టత

సిడ్నీ టెస్టు కోసం పూర్తి సన్నద్ధంగా లేనని డేవిడ్ వార్నర్ తెలిపాడు. తుదిజట్టులో ఉండాల్సి వస్తే మాత్రం తప్పకుండా తనవంతు కృషిచేస్తానని అన్నాడు.

టీమ్​ఇండియాతో మూడో టెస్టులో ఆడే విషయం గురించి ఆసీస్ ఓపెనర్ వార్నర్ మాట్లాడాడు. పూర్తి ఫిట్​నెస్​ సాధించడం సందేహమేనని అన్నాడు. సెలెక్షన్​ ప్యానెల్, మేనేజ్​మెంట్​ పిలుపు మేరకు సిద్ధంగా ఉండేందుకు తీవ్రంగా శ్రమిస్తానని చెప్పాడు.

గాయం కారణంగా టీ20 సిరీస్​తో పాటు తొలి రెండు టెస్టులకు దూరమైన వార్నర్​ను ఎలగైనా సిడ్నీ టెస్టులో ఆడించాలని క్రికెట్ ఆస్ట్రేలియా(సీఏ) భావిస్తోంది.

"కొన్నిరోజులుగా ప్రాక్టీస్​ చేయలేదు. రెండు రోజులు శిక్షణలో పాల్గొన్న తర్వాత నా పరిస్థితి గురించి మాట్లాడగలను. 100 శాతం సిద్ధంగా ఉన్నానని చెప్పలేను. కానీ సెలెక్టర్లు ఆడాల్సిందే అంటే మాత్రం అత్యుత్తమ ప్రదర్శన చేసేందుకు ప్రయత్నిసాను." -డేవిడ్ వార్నర్, ఆస్ట్రేలియా బ్యాట్స్​మన్

ప్రాక్టీస్​లో భారీ షాట్లకు ప్రయత్నించలేదని వార్నర్ చెప్పాడు. మ్యాచ్​లోనూ సింగిల్స్​కే ప్రాధాన్యత ఇస్తానని తెలిపాడు. క్యాచ్​ల కోసం డైవ్​ చేయడంలో ఇబ్బంది పడతానని అనిపిస్తే జట్టుకు భారంగా మారదలచుకోలేదని అన్నాడు.

ఆసీస్​ బ్యాట్స్​మన్ జో బర్న్స్, మ్యాథ్యూ వేడ్​లు తొలి రెండు మ్యాచుల్లో విఫలమవడం వల్ల వార్నర్​ను​ బరిలోకి దింపాలనుకుంటుంది ఆస్ట్రేలియా. జనవరి 7 నుంచి సిడ్నీలో ఈ మ్యాచ్​ ప్రారంభం కానుంది.

ఇదీ చూడండి:పుజారాను కాదని వైస్​ కెప్టెన్సీ రోహిత్​కే ఎందుకు?