'ఈ సమయంలో భారత్-పాక్ సిరీస్​ చాలా ముఖ్యం'

భారత్-పాకిస్థాన్ మధ్య త్వరలోనే ద్వైపాక్షిక సిరీస్ జరగబోతుందని సమాచారం. తాజాగా ఈ విషయమై స్పందించాడు పాక్ మాజీ క్రికెటర్ షాహిద్ అఫ్రిదీ. క్రీడల వల్ల ఇరుదేశాల మధ్య సంబంధాలు బలపడతాయని తెలిపాడు.

భారత్​-పాకిస్థాన్ మధ్య ద్వైపాక్షిక సిరీస్​లు జరగక దాదాపు 8 ఏళ్లు కావొస్తుంది. ఇరు దేశాల మధ్య సరిహద్దు ఉద్రిక్తతల కారణంగా.. ఆ ప్రభావం క్రికెట్​పైనా పడింది. కానీ, ఈ రాజకీయాలు అన్నీ పక్కనపెట్టి ఇరుదేశాలు త్వరలోనే ఓ సిరీస్​లో పాల్గొబోతున్నాయని తెలుస్తోంది. ఈ ఏడాదే రెండు దేశాల మధ్య 3 మ్యాచ్​ల టీ20 సిరీస్ జరగనుందని సమాచారం. తాజాగా దీనిపై స్పందించాడు పాక్ మాజీ క్రికెటర్ షాహిద్ అఫ్రిదీ. క్రికెట్ వల్ల ఇరుదేశాల మధ్య స్నేహబంధం పెరుగుతుందని పేర్కొన్నాడు.

"భారత్-పాకిస్థాన్ మధ్య క్రికెట్ సిరీస్​లు చాలా ముఖ్యం. క్రీడల్ని రాజకీయలకు దూరంగా ఉంచాలి. క్రికెట్ వల్ల ఇరుదేశాల మధ్య సంబంధాలు బలపడతాయి. పాక్​కు రావడాన్ని భారత క్రికెటర్లు ఎంజాయ్ చేస్తారని నా నమ్మకం."

-అఫ్రిదీ, పాక్ మాజీ క్రికెటర్

పాకిస్థాన్ వార్తా పత్రిక 'జాంగ్​' ప్రకారం.. దాయాది దేశంతో టీమ్​ఇండియా త్వరలోనే ద్వైపాక్షిక సిరీస్​ ఆడనుందని తెలుస్తోంది. ఇరు దేశాల మధ్య చర్చలు తిరిగి ప్రారంభమైన వెంటనే సిరీస్​ నిర్వహణకు సిద్ధంగా ఉండాలని పాక్ క్రికెట్​ బోర్డుకు ఆ దేశ ప్రభుత్వ ఉన్నత వర్గాల నుంచి ఆదేశాలు వచ్చినట్లు ఆ పత్రిక పేర్కొంది.