ఇంగ్లాండ్తో సిరీస్లో వాషింగ్టన్ సుందర్ సెంచరీ చేసే అవకాశాన్ని కోల్పోవడంపై అతడి తండ్రి ఎం.సుందర్ స్పందించారు. టెయిలెండర్లు కొద్దీ సేపు కూడా క్రీజులో నిలువకుండా ఔట్ కావడంపై అసంతృప్తి వ్యక్తం చేశారు.
"నాల్గో టెస్టులో టెయిలెండర్ల ఆట పట్ల నిరాశగా ఉంది. వాళ్లు కొద్ది సేపైనా క్రీజులో నిలువలేకపోయారు. భారత్ మరో 10 పరుగులు చేయాల్సిన స్థితిలో కూడా వీరిలాగే ఆడతారా? ఇది పెద్ద తప్పు కాకపోవచ్చు. కానీ, లక్షల మంది ఈ మ్యాచ్ను చూశారు. టెయిలెండర్ల ఆట నుంచి వారేం నేర్చుకోవాలి?"
-ఎం.సుందర్, వాషింగ్టన్ సుందర్ తండ్రి.
"అప్పటికే ఇంగ్లాండ్ జట్టు బౌలర్లు అలసిపోయి ఉన్నారు. స్టోక్స్ 123-126 సగటు వేగంతో బౌలింగ్ చేశాడు. టెయిలెండర్లు.. వారి బ్యాటింగ్లో టెక్నిక్, నైపుణ్యం ప్రదర్శించాల్సిన పని లేదు. కొంచెం తెగువతో క్రీజులో నిలబడితే సరిపోయేది" అని ఎం.సుందర్ పేర్కొన్నారు.
వాషింగ్టన్ బ్యాటింగ్పై వస్తున్న వ్యాఖ్యలపైనా ఎం.సుందర్ స్పందించాడు. 'వాషింగ్టన్ బ్యాటింగ్ చూసి ప్రజలెందుకు ఆశ్చర్యపోతున్నారో నాకైతే అర్థం కావడం లేదు. టీమ్ఇండియా ఎలా ఆడాలని చెప్పినా.. ఆడేందుకు అతడు సిద్ధం' అని ఆయన తెలిపారు.
ఈ సిరీస్లో 90.50 సగటుతో 181 పరుగులు చేసిన వాషింగ్టన్.. తొలి, చివరి టెస్టుల్లో సెంచరీ చేసే అవకాశాన్ని కోల్పోయాడు. చెన్నై టెస్టులో 85* పరుగులు, మొతేరా టెస్టులో 96* పరుగులు చేశాడు. ఈ రెండు సందర్భాల్లో టెయిలెండర్లు త్వరగా పెవిలియన్ చేరారు.
ఇదీ చదవండి:అదే ఎక్కువ సంతోషాన్నిచ్చింది: కోహ్లీ
