'కార్గిల్​ సమయంలో రూ.1.71 కోట్ల కాంట్రాక్ట్​ వదిలేశా'

కార్గిల్​ యుద్ధంలో పాల్గొనేందుకు దాదాపు రూ.1.71 కోట్ల కాంట్రాక్ట్​ను వదులుకున్నట్లు తెలిపాడు పాక్​ మాజీ క్రికెటర్​ షోయబ్​ అక్తర్​. ఆనాడు నాటింగ్​ హామ్​షైర్​తో చేసుకున్న ఒప్పందాన్ని రద్దు చేసుకున్నట్లు వెల్లడించాడు.

భారత్​-పాకిస్థాన్​ మధ్య 1999లో జరిగిన కార్గిల్​ యుద్ధ​ సమయంలో.. భారీ కాంట్రాక్ట్​ వదులుకున్నట్లు వెల్లడించాడు పాక్​ మాజీ క్రికెటర్​ షోయబ్​ అక్తర్​. నాటింగ్​హామ్​షైర్​ తరఫున ఆడేందుకు చేసుకున్న రూ.1.71 కోట్ల ఒప్పందాన్ని రద్దు చేసుకొని.. యుద్ధంలో పాల్గొనేందుకు ప్రయత్నించినట్లు తెలిపాడు. ఆ సమయంలో దేశం కోసం ప్రాణాలర్పించేందుకు సిద్ధమైనట్లు స్పష్టం చేశాడు.

" నేను లాహోర్​ సరిహద్దుల్లో ఉన్నాను. ఓ ఆర్మీ జనరల్​ వచ్చి నువ్విక్కడ ఏం చేస్తున్నావ్​? అని అడిగారు. మనిద్దరం కలిసి చనిపోబోతున్నాం అని అతనికి చెప్పా. యుద్ధం సమయంలో రెండుసార్లు క్రికెట్​ను వదిలేశాను. నాటింగ్​హామ్​తో రూ.1.71 కోట్ల కాంట్రాక్ట్​ సహా మరో పెద్ద ఆఫర్​ను కార్గిల్​ సమయంలో వదులుకున్నా. అప్పుడు ఆయా కౌంటీలు షాక్​ అయ్యాయి"

-- షోయబ్ అక్తర్​, పాక్​ మాజీ క్రికెటర్​.

పాకిస్థాన్​లోని తన స్నేహితులకు ఫోన్​ చేసి.. యుద్ధంలో పోరాడేందుకు సిద్ధంగా ఉన్నట్లు చెప్పినట్లు అక్తర్​ వెల్లడించాడు.

క్రీడలు, రాజకీయాలపై ఎప్పటికప్పుడు తన అభిప్రాయాలు తెలిపే అక్తర్​.. కరోనాతో ఏర్పడిన నష్టాన్ని పూడ్చడానికి భారత్​-పాకిస్థాన్​ మధ్య ద్వైపాక్షిక సిరీస్​ నిర్వహించాలని అభిప్రాయపడ్డాడు. అయితే ఆ సూచనను కపిల్​దేవ్​ అంగీకరించలేదు. ఇరుదేశాల మధ్య మ్యాచ్​ ఆప్షన్​ కాదని స్పష్టం చేశారు.

కార్గిల్​ యుద్ధం సమయంలో దాదాపు 16 వేల అడుగుల ఎత్తైన ప్రాంతంలో భారత్​, పాక్​ సైన్యాలు తలపడ్డాయి. ఈ పోరులో 1,042 మంది పాక్​ అధికారులు చనిపోయారు. భారత్​కు చెందిన 527 మంది సైనికులు యుద్ధంలో వీరమరణం పొందారు.