ఫిక్సింగ్ ఆరోపణలతో రెండేళ్ల నిషేధం ఎదుర్కొంటున్న బంగ్లాదేశ్ ఆల్రౌండర్ షకిబ్ అల్ హసన్ వాట్సాప్ సంభాషణను బహిర్గతం చేసింది ఐసీసీ. భారత బుకీ దీపక్ అగర్వాల్తో కొనసాగించిన సందేశాలను విడుదల చేసింది.
ఇద్దరం కలిసి పనిచేద్దాం..
2018 జనవరి 19న దీపక్ అగర్వాల్ నుంచి షకిబ్ అల్ హసన్కు వాట్సాప్ సందేశం వచ్చింది. మ్యాన్ ఆఫ్ ద మ్యాచ్గా ఎంపికైనందుకు షకిబ్ను అభినందించాడు దీపక్. తర్వాతి మెసేజ్లో 'మనం ఈ విషయంపై కలిసి పనిచేద్దాం లేదా ఐపీఎల్ వరకు నేను ఎదురుచూస్తా' అని సంభాషించాడు.
జట్టు గురించి సమాచారం అడిగేందుకు దీపక్ ప్రయత్నించాడు. ఆ విషయాన్ని షకిబ్ ఐసీసీ అవినీతి నిరోధక విభాగానికి(ఏసీయూ), ఇతర అవినీతి నిరోధక సంస్థలకుగానీ చేరవేయలేదు.
'బ్రో ఈ సిరీస్లో ఏమైనా ఉందా..'
జనవరి 23న అతడి నుంచి షకిబ్కు మరో సందేశం వచ్చింది. ఈ సిరీస్లో ఏమైనా సమాచారం దొరుకుతుందా(బ్రో ఎనీథింగ్ ఇన్ దిస్ సిరీస్) అని అడిగాడు. ఈ మెసేజ్తో జట్టు అంతర్గత సమాచారం తీసుకునేందుకు దీపక్ ప్రయత్నించాడనే విషయం స్పష్టంగా తేలిపోయింది. ఈ అంశాన్నీ అధికారుల దృష్టికి తీసుకురాలేదు షకిబ్.
కలుద్దామనుకుంటున్నా..
ఏప్రిల్ 26న షకిబ్ను మరోసారి సంప్రందించాడు దీపక్ అగర్వాల్. ఈ సారి సన్రైజర్స్ హైదరాబాద్ జట్టులో ఏ ఆటగాడు ఆడతాడు, వారి వివరాలను అడిగాడు. అంతేకాకుండా షకిబ్కు సంబంధించిన డాలర్ బ్యాంక్ అకౌంట్ వివరాలు, బిట్ కాయిన్స్ సంబంధిత ఖాతాల గురించి సంభాషించాడు. ఈ కబుర్లు కొనసాగుతుండగానే దీపక్ తనను కలవాలనుకుంటున్నాడని షకిబ్ తెలిపాడు.
ఇదే రోజు బంగ్లా క్రికెటర్ కొన్ని మెసేజ్లు డిలీట్ చేశాడు. వాటి గురించి ఆరా తీయగా.. జట్టు అంతర్గత సమాచారం గురించి అడిగాడని తెలిపాడు షకిబ్. అయితే దీపక్ బుకీ అని తెలిసిందని, అతడితో ప్రమాదముందని గ్రహించానని చెప్పాడు.
ఈ విషయం ఐసీసీకి వెల్లడించడంలో విఫలమైనందుకు షకిబ్పై రెండేళ్ల పాటు వేటు వేసింది ఐసీసీ. తప్పును అంగీకరించినందుకు గాను ఏడాది నిషేధం, ఏడాది సస్పెన్షన్లో ఉంచింది. దీపక్ అడిగిన సమాచారం.. షకిబ్ అందించినట్లు ఆధారాలేమీ లేవు కానీ.. తనను బుకీ సంప్రదించిన విషయంపై అతడు ఏసీయూకు సమాచారం ఇవ్వకపోవడం ఐసీసీ ఆగ్రహానికి కారణమైంది.
వచ్చే ఏడాది అక్టోబరు 29 వరకు షకిబ్ అంతర్జాతీయ క్రికెట్కు దూరం కానున్నాడు. ఆస్ట్రేలియా వేదికగా జరగనున్న 2020 ప్రపంచకప్నకూ దూరమయ్యాడు.
ఇదీ చదవండి: పొట్టి ప్రపంచకప్లో ఆడనున్న నమీబియా
