సౌరభ్ గంగూలీ.. బీసీసీఐ అధ్యక్షుడిగా బాధ్యతలు తీసుకున్నప్పుడేదేశవాళీ క్రికెట్ను ప్రక్షాళన చేయాల్సిన అవసరముందని చెప్పాడు. తాజాగా ఈ అంశాన్ని దాదాకు మరోసారి గుర్తుచేశాడు దిగ్గజ క్రికెటర్ సచిన్ తెందూల్కర్. కుర్రాళ్లలో జట్టు స్ఫూర్తి లోపించిందని, ఫస్ట్క్లాస్ క్రికెట్పైనా దృష్టిపెట్టాలని గంగూలీకి మాస్టర్ సూచించాడు.
"దులీప్ ట్రోఫీపై గంగూలీ దృష్టిపెట్టాల్సిందిగా కోరుతున్నా. ఈ ప్రతిష్టాత్మక టోర్నమెంట్లో యువ క్రికెటర్లు.. జట్టుగా ఆడడాన్ని విస్మరించారు. వ్యక్తిగత ప్రదర్శనకే ప్రాధాన్యమిచ్చారు. ఐపీఎల్ వేలం, టీ20 ప్రపంచకప్, వన్డే సిరీస్లు లాంటి వాటినే యువ క్రికెటర్లు దృష్టిలో పెట్టుకొని ఆడుతున్నారు" -సచిన్ తెందూల్కర్.
క్రికెట్ అనేది జట్టుగా ఆడాల్సిన ఆటని మాస్టర్ బ్లాస్టర్ సచిన్ అన్నాడు.
"దులీప్ ట్రోఫీని పునరుద్ధరించాలంటే ఓ మార్పు తప్పనిసరిగా చేయాలి. క్రికెట్ అనేది జట్టుగా ఆడాల్సిన ఆట. కలిసికట్టుగా అత్యుత్తమ ప్రదర్శన చేసిన క్రికెటర్లకు ప్రాధాన్యమివ్వాలి. రంజీ ఫైనల్లో తలపడిన వాటినే కాకుండా, సెమీస్ వరకు వచ్చిన నాలుగు జట్లనూ పరిశీలించాలి. ఈ విధంగా వివిధ టీమ్ల్లో ప్రతిభ గల ఆటగాళ్లను ఎంపిక చేయాలి. అండర్-19, అండర్-23లోని యువ క్రికెటర్లనూ పరిశీలించాలి. ఇలా చేస్తే అత్యుత్తమ ప్రతిభావంతులు వెలుగులోకి వస్తారు" -సచిన్ తెందూల్కర్
అక్టోబరు 23న బీసీసీఐ అధ్యక్షుడిగా గంగూలీ బాధ్యతలు స్వీకరించాడు. పదవి చేపట్టిన కొద్ది రోజుల్లోనే భారత్కు తొలి డే/నైట్ టెస్టు నిర్వహించి, తన మార్కును చూపించాడు. ఈ మ్యాచ్లో బంగ్లాదేశ్పై భారత్.. ఇన్నింగ్స్ 46 పరుగుల తేడాతో విజయం సాధించింది.
ఇదీ చదవండి: ఈ దశాబ్దం విరాట్దే.. పదేళ్లలో 20వేల పరుగులు
