బంగ్లాదేశ్తో జరిగిన చివరి టీ20లో టీమిండియా గెలుపొంది సిరీస్ కైవసం చేసుకుంది. ఈ మ్యాచ్లో యువ బౌలర్ దీపక్ చాహర్ హ్యాట్రిక్తో పాటు మొత్తం ఆరు వికెట్లు తీసి భారత్ విజయంలో కీలకపాత్ర పోషించాడు. ఫలితంగా టీ20ల్లో రికార్డు నమోదు చేశాడు. ఈ ఏడాది టీ20లతో పాటు వన్డే, టెస్టుల్లోనూ హ్యాట్రిక్ సాధించిన జట్టుగా టీమిండియా నిలిచింది.
దీపక్ చాహర్ (టీ20)
బంగ్లాతో జరిగిన మ్యాచ్లో చివర్లో షఫియుల్‌, ముస్తాఫిజుర్‌, అమినుల్‌ ఇస్లామ్‌ను వరుస బంతుల్లో ఔట్‌చేసి దీపక్ చాహర్ హ్యాట్రిక్‌ను తన ఖాతాలో వేసుకున్నాడు. భారత్ తరఫున టీ20ల్లో హ్యాట్రిక్ సాధించిన తొలి బౌలర్గా రికార్డు సృష్టించాడు. 7 పరుగులకే 6 వికెట్లు తీసి టీ20 చరిత్రలో అత్యుత్తమ గణాంకాలు నమోదు చేశాడు.
బుమ్రా (టెస్టు)
టీమిండియా స్పీడ్ స్టార్ జస్ర్పీత్ బుమ్రా వెస్టిండీస్తో జరిగిన టెస్టు సిరీస్లో హ్యాట్రిక్ సాధించాడు. వరుసగా బ్రూక్స్, రోస్టర్ ఛేజ్, డారెన్ బ్రావోలను పెవిలియన్ చేర్చి ఈ ఘనత సాధించాడు. ఫలితంగా టెస్టుల్లో హ్యాట్రిక్ సాధించిన మూడో బౌలర్గా నిలిచాడు. ఇతడికంటే ముందు హర్భజన్ సింగ్, ఇర్భాన్ పఠాన్ ఈ క్లబ్లో చేరారు.
షమీ (వన్డే)
ఈ ఏడాది జరిగిన వన్డే ప్రపంచకప్లో అఫ్గానిస్థాన్పై హ్యాట్రిక్ నమోదు చేశాడు మహ్మద్ షమీ. వరుసగా మహ్మద్ నబీ, అఫ్తాబ్ ఆలమ్, ముజిబుర్ రెహ్మన్లను ఔట్ చేశాడు. ఫలితంగా 32 ఏళ్ల తర్వాత ప్రపంచకప్లో హ్యాట్రిక్ తీసిన భారత బౌలర్గా నిలిచాడు. 1987లో న్యూజిలాండ్తో జరిగిన వరల్డ్కప్ మ్యాచ్లో చేతన్ శర్మ ఈ ఘనత సాధించాడు.
ఇవీ చూడండి.. రిటైర్మెంట్ తర్వాత కోహ్లీ ఏం చేస్తాడో తెలుసా?
