భారత క్రికెట్‌లో గొప్ప సారథులంటే వెంటనే గుర్తొచ్చే పేర్లు కపిల్‌దేవ్‌, గంగూలీ, ధోనీ, కోహ్లీలే. కానీ 2005 నుంచి 2007 వరకు నాయకత్వం వహించిన దిగ్గజ బ్యాట్స్‌మన్‌ రాహుల్ ద్రవిడ్‌ను ఎవరూ అంతగా గుర్తించరు. అతను కూడా సారథిగా టీమ్‌ఇండియాకు మంచి విజయాలు అందించాడు. కానీ, 2007 ప్రపంచకప్‌లో భారత్‌ ఘోర పరాభవం చెందడం వల్ల అతనికి దక్కాల్సిన గుర్తింపు దక్కలేదు. అయితే, ద్రవిడ్లోనూ మంచి సారథి ఉన్నాడని, ఆటను అర్థం చేసుకోవడంలో అతడు ఎలా ఆలోచిస్తాడో ఒక ఉదాహరణ చెప్పాడు క్రికెటర్ సురేశ్ రైనా. 2006లో పాకిస్థాన్తో జరిగిన ఒక వన్డేలో నాటి కెప్టెన్గా ఉన్న ద్రవిడ్.. తనను పాయింట్‌లో ఫీల్డింగ్‌ చేయమన్నాడని, అక్కడ సిద్ధంగా ఉంటే క్యాచ్‌ వస్తుందని చెప్పగా నిజంగా అలా జరిగిందని వివరించాడు.
"చిరకాల ప్రత్యర్థి పాక్‌తో జరిగిన ఆ మ్యాచ్ నాకింకా గుర్తుంది. అప్పుడు ద్రవిడ్ సారథిగా ఉన్నాడు. పఠాన్‌ బౌలింగ్‌ చేస్తున్నాడు. కమ్రన్‌ అక్మల్‌ క్రీజులో ఉన్నాడు. అప్పట్లో క్యాచ్‌లు అందుకునేందుకు 15 గజాలలోపు ఫీల్డర్లను పెట్టుకోవచ్చనే నియమం ఉండేది. దాంతో నన్ను పాయింట్‌లో ఉంటావా అని కెప్టెన్ అడిగాడు. నేను సరేనన్నా. అయితే, నన్ను నిలబెట్టిన చోట కాస్త ముందుకు వంగి, క్యాచ్‌ తీసుకోడానికి సిద్ధంగా ఉండమని ద్రవిడ్ చెప్పాడు. పఠాన్‌ వేసిన తర్వాతి బంతినే అక్మల్‌ షాట్‌ ఆడాడు. ఆ బంతి నేరుగా వచ్చి నా చేతుల్లో పడింది. అప్పుడు రాహుల్ భాయ్‌ క్యాచ్‌ వస్తుందని ముందే ఊహించడం నన్ను చాలా ఆకట్టుకుంది."