'సన్​రైజర్స్​ జట్టులో ఆడటం నా కెరీర్​కు మలుపు​'

ఐపీఎల్​లో ఆడటం ద్వారా ఆటలో ఒత్తిడిని ఎలా ఎదుర్కోవాలో తెలిసిందన్నాడు టీమ్​ఇండియా పేసర్​ భువనేశ్వర్​ కుమార్​. సన్​రైజర్స్ హైదరాబాద్​ జట్టుకు ఆడుతున్నపుడు యార్కర్లు వేసే సామర్థ్యం మెరుగైందని వెల్లడించాడు.

ఐపీఎల్​లో సన్​రైజర్స్ హైదరాబాద్​ తరఫున ఆడటం తన కెరీర్​లో పెద్ద మలుపని అన్నాడు టీమ్​ఇండియా పేసర్​ భువనేశ్వర్​ కుమార్​. కీలక ఓవర్లలో ఒత్తిడిని తట్టుకుంటూ బౌలింగ్​ చేయడం సహా యార్కర్లు వేయగల సామర్థ్యాన్ని ఆ జట్టుతో ఉన్నప్పుడే నేర్చుకున్నానని తాజాగా ఓ ఇంటర్వ్యూలో వెల్లడించాడు.

"నాకు యార్కర్లు వేయగల సామర్థ్యం ఉంది. కానీ, క్రమంగా దాన్ని కోల్పోయా. ఐపీఎల్​లో సన్​రైజర్స్​ జట్టులో ఆడే సమయంలో మొదటి, చివరి ఓవర్లను నాతో బౌలింగ్​ చేయించేవారు. 2014లో 14 మ్యాచ్​ల అనుభవంతో ఒత్తిడిని ఎదుర్కోవడం నేర్చుకున్నా. అదే నా కెరీర్​కు మలుపు. ప్రత్యేకంగా డెత్​ ఓవర్లలో ఒత్తిడిని ఎలా తట్టుకోవాలో అవగాహన చేసుకున్నా. ధోనీలాగా నేను ఫలితం గురించి ఆలోచించకుండా కెరీర్​పై దృష్టి సారించా. దీంతో చివరికి అవే ఫలితాన్ని పొందడంలో సహాయపడ్డాయి".

- భువనేశ్వర్​ కుమార్​, టీమ్​ఇండియా పేసర్​

లాక్​డౌన్​ విరామంలో ఆటకు దూరంగా ఉంటూ తనలో తాను ప్రేరణ పొందటం చాలా కష్టమని పేర్కొన్నాడు భువనేశ్వర్​. "లాక్​డౌన్​లో మొదటి 15 రోజులు నాలో నేను మరింత ప్రేరణ పొందా. కానీ, అది ఎన్ని రోజులు కొనసాగుతుందో ఎవరికీ తెలియదు. ఇంట్లో వ్యాయామం చేయడానికి నా దగ్గర పరికరాలూ లేవు. ఆ 15 రోజుల తర్వాత నాలో నేను స్ఫూర్తి​ పొందడం కొంచెం కష్టంగా అనిపించింది. అప్పుడే వ్యాయామ పరికరాలను తెప్పించుకుని ఇంట్లోనే వర్కౌట్లు చేయడం మొదలుపెట్టా. ఈ విరామం తర్వాత నన్ను సరికొత్త రీతిలో చూస్తారు. మైదానంతో పోలిస్తే ఇంట్లో వ్యాయామాలకు చాలా వ్యత్యాసం ఉంటుంది. కానీ, నేను ఫిట్​గా ఉంటూ నాలో ప్రతిభను మరింత పెంచుకుంటున్నా" అని తెలిపాడు.

ఇదీ చూడండి...'పబ్​లకు అనుమతిచ్చారు.. మరి క్రికెట్​కు ఎప్పుడు?'