లఖ్నవూ వేదికగా ఇటీవలే ఆఫ్గానిస్థాన్తో జరిగిన మ్యాచ్‌లో వెస్టిండీస్‌ స్టార్‌ ఆటగాడు నికోలస్‌ పూరన్ బాల్ ట్యాంపరింగ్‌కు పాల్పడ్డాడు. ఫలితంగా అతనిపై నాలుగు టీ20 మ్యాచ్ల నిషేధం పడింది. అయితే ఇదే తరహాలో ఆసీస్ ఆటగాడు స్టీవ్ స్మిత్ గతంలో బాల్ ట్యాంపరింగ్ చేశాడు. ఈ ఆస్ట్రేలియా ఆటగాడు మాత్రం ఏడాది నిషేధం ఎదుర్కొన్నాడు. తాజాగా పూరన్కు ఎందుకు తక్కువ శిక్ష పడిందని స్టీవ్ స్మిత్‌ను అడిగారు.
పూరన్కు తక్కువ నిషేధం పడితే తనకేం సంబంధం అని ప్రశ్నించిన స్మిత్... శిక్షాకాలం తక్కువ ఉండటం వల్ల తనకు ఇబ్బందేమీ లేదన్నాడు.
"ప్రతి ఒక్కరూ విభిన్నంగా ఉంటారు. ప్రతీ దేశ క్రికెట్ బోర్డు అంతే. ఇలాంటి సందర్భాల్లో చాలా విషయాలు కలిసి ఉంటాయి. నాకు కఠినమైన శిక్ష పడిందని నేనేమీ నిరూత్సాహపడలేదు. అది గతం. నేను దాని నుంచి బయటపడి వర్తమానంలో బ్రతుకుతున్నా. నాకు నికోలస్‌ పూరన్ తెలుసు. అతనితో క్రికెట్ ఆడిన అనుబంధం ఉంది. అతనొక టాలెంట్‌ ఉన్న క్రికెటర్. మంచి భవిష్యత్తు ఉంది. అతను.. చేసిన తప్పిదాల నుంచి పాఠాలు నేర్చుకుంటాడు."
-- స్టీవ్ స్మిత్ , ఆసీస్ క్రికెటర్.
ఆఫ్గానిస్థాన్తో జరిగిన మూడో వన్డేలో విండీస్ క్రికెటర్ పూరన్ బాల్ ట్యాంపరింగ్‌కు పాల్పడినట్లు తేల్చింది ఐసీసీ. బంతి ఆకారాన్ని మార్చినట్లు పూరన్ అంగీకరించి, క్షమాపణలూ కోరాడు. ఫలితంగా నాలుగు మ్యాచ్ల నిషేధం విధిస్తూ నిర్ణయం తీసుకుంది ఐసీసీ.
