'ఇంట్లోనే ఉండండి.. ప్రపంచకప్​నకు ఇంకా సమయముంది'

కరోనా వ్యాప్తి తీవ్రమవుతున్న నేపథ్యంలో అందరూ ఇంట్లోనే ఉండాలని సూచించాడు టీమిండియా క్రికెటర్ రోహిత్ శర్మ. ఈ వైరస్​ను అరికట్టేందుకు ఇప్పటికే రూ.80 లక్షలు విరాళమిచ్చాడీ ఓపెనర్.

భారత్​లో కరోనా వ్యాప్తి రోజురోజుకు తీవ్రమవుతోంది. దీంతో పలువురు సెలబ్రిటీలు.. నెటిజన్లను ఇంట్లోనే ఉండమని కోరుతున్నారు. బయట తిరిగితే వైరస్​ సోకే ప్రమాదముందని హెచ్చరిస్తున్నారు. ప్రధాని నరేంద్ర మోదీ సూచన మేరకు ఆదివారం కొవ్వుత్తులు వెలిగించి, ప్రజలు ఐక్యత చాటారు. కొందరు మాత్రం పటాస్​లు కాల్చారు. దీనిపై స్పందించిన క్రికెటర్ రోహిత్ శర్మ.. ప్రపంచకప్​నకు ఇంకా సమయముందని, ఇంట్లోని ఉండమని ప్రజలకు సూచించాడు. ఈ ఏడాది ప్రపంచకప్​లో భారత్​ విజేతగా నిలిచిన తర్వాత టపాకాయలు కాల్చొచ్చని పరోక్షంగా చెబుతూ ట్వీట్ చేశాడు.

కరోనాను అరికట్టటంలో భాగంగా ఇప్పటికే రూ.80 లక్షలు విరాళం ప్రకటించాడు రోహిత్. ఈ వైరస్ ప్రభావంతో, మార్చి 29 నుంచి మొదలుకావాల్సిన ఐపీఎల్.. ఈ నెల 15కు వాయిదా పడింది. అయితే టోర్నీ జరిగేది లేనిది సందేహంగా మారింది. ఈ లీగ్​లో ముంబయి ఇండియన్స్​కు​ కెప్టెన్​గా ఉన్నాడు రోహిత్. ఇతడి సారథ్యంలో నాలుగుసార్లు విజేతగా నిలిచిందీ జట్టు.