న్యూజిలాండ్‌తో గాలేలో జరిగిన తొలి టెస్టులో ఆతిథ్య శ్రీలంక జట్టు 6 వికెట్ల తేడాతో విజయం సాధించింది. లంక సారథి కరుణరత్నె122 పరుగులతో లంక విజయంలో కీలక పాత్ర పోషించాడు. ఫలితంగా రెండు మ్యాచ్ల సిరీస్లో భాగంగా తొలి టెస్టును ఆరు వికెట్ల తేడాతో కైవసం చేసుకుంది లంక. ఈ విజయంతో ప్రపంచ ఛాంపియన్షిప్లో ఖాతా తెరిచారు లంకేయులు.
కెప్టెన్ ఇన్నింగ్స్...
రెండో ఇన్నింగ్స్లో 268 పరుగుల లక్ష్యంతో బరిలోకి దిగిన శ్రీలంక... నాలుగు వికెట్లు కోల్పోయి విజయాన్ని అందుకుంది. ఓవర్‌నైట్‌ స్కోరు 133/0తో రెండో ఇన్నింగ్స్ను కొనసాగించిన లంక.. ఆదిలోనే తిరమన్నె (64) వికెట్‌ కోల్పోయింది. అనంతరం కరుణరత్నె శతకంతో ఇన్నింగ్స్ చక్కబెట్టాడు. మిగిలిన లక్ష్య ఛేదనలో కుశాల్‌ మెండిస్‌ (10) త్వరగానే ఔటైనా.. మాథ్యూస్‌ (28*), కుశాల్‌ పెరీరా (23), డిసిల్వా(14*) ఇన్నింగ్స్ను ముగించారు. విజయంలో కీలక పాత్ర పోషించిన కరుణరత్నెకు మ్యాన్‌ ఆఫ్‌ ది మ్యాచ్ దక్కింది.
న్యూజిలాండ్ తొలి ఇన్నింగ్స్లో 249 పరుగులు చేయగా... శ్రీలంక 267 రన్స్ సాధించింది. రెండో ఇన్నింగ్స్లో కివీస్ 285 పరుగులకే ఆలౌటైంది. రెండు టెస్టుల సిరీస్లో 1-0తో ఆధిక్యంలో నిలిచింది లంక జట్టు. ఆగస్టు 22 నుంచి కొలంబో వేదికగా రెండో టెస్టు ప్రారంభం కానుంది.
