మ్యాచ్ ఫిక్సింగ్ ఆరోపణలతో ఏడేళ్ల పాటు నిషేధం ఎదుర్కొన్న టీమ్ఇండియా పేసర్ శ్రీశాంత్ శిక్షా కాలం ఆదివారంతో ముగిసింది. ఈ సందర్భంగా ఓ వార్తా సంస్థకు ఇంటర్వ్యూ ఇచ్చిన అతడు.. ఈ విషయంపై ఆనందం వ్యక్తం చేశాడు. ఇకపై ఆటకు అందుబాటులో ఉంటానని చెప్పాడు. త్వరలోనే దేశవాళీ క్రికెట్ కెరీర్ను మళ్లీ ప్రారంభిస్తానని తెలిపాడు. టీమ్ఇండియాలోనూ తిరిగి స్థానం దక్కించుకుంటాననే నమ్మకం తనకు ఉందని పేర్కొన్నాడు.
"ఇప్పుడు నాపై ఉన్న నిషేధం పూర్తిగా తొలగిపోయింది. ఇకపై నాకు ఎంతో ఇష్టమైన క్రికెట్ను ఆడగలను. ఏ జట్టు తరఫున ఆడినా నా వంతు ప్రయత్నంగా బాగా రాణిస్తాను".
-శ్రీశాంత్, టీమ్ఇండియా పేసర్.
ప్రస్తుతం కరోనా కారణంగా దేశవాళీ క్రికెట్ వాయిదా పడింది. దీన్ని పునః ప్రారంభించేందుకు బీసీసీఐ అన్ని రాష్ట్రాల క్రికెట్ బోర్డులతో చర్చలు జరుపుతోంది. శ్రీశాంత్ తన ఫిట్నెస్ను నిరూపించుకుంటే తమ తరఫున ఆడే అవకాశాన్ని ఇస్తామని ప్రకటించింది కేరళ బోర్డు.
2013లో మ్యాచ్ ఫిక్సింగ్ కారణంగా శ్రీశాంత్పై జీవితకాల నిషేధం విధించింది బీసీసీఐ. అయితే సుప్రీం ఆ నిషేధాన్ని ఇటీవల ఎత్తివేస్తూ.. శిక్షను ఏడేళ్లకు కుదించింది. అది నేటితో ముగుస్తుంది. టీమ్ఇండియా తరఫున శ్రీశాంత్ 27 టెస్టులు, 53 వన్డేలు, 10 టీ20 మ్యాచ్లు ఆడాడు.
ఇదీ చూడండి ఐపీఎల్ 2020: ప్రాక్టీసులో వికెట్ విరగ్గొట్టిన బౌల్ట్
