చేజారిన శతకం.. కానీ ఈ ఇన్నింగ్స్​ 'సుందరం'

జట్టు ఆపదలో ఉన్నప్పుడు మరో కీలక ఇన్నింగ్స్​ ఆడాడు ఆల్​రౌండర్​ వాషింగ్టన్​ సుందర్. త్రుటిలో సెంచరీ చేసే అవకాశాన్ని కోల్పోయినా.. టీమ్​ అవసరానికి అతడు చేసిన పరుగులు శతకం కంటే ఎక్కువే! అని అభిమానులు సామాజిక మాధ్యమాల్లో విపరీతంగా పోస్టులు చేస్తున్నారు. మాజీ డ్యాషింగ్​ ఓపెనర్​ వీరేంద్ర సేహ్వాగ్​.. సుందర్​ను ప్రశంసించాడు.

భారత యువ ఆల్​రౌండర్​ వాషింగ్టన్​ సుందర్​.. మరో అద్భుత ఇన్నింగ్స్​ ఆడాడు. 146/6 వద్ద జట్టు కష్టాల్లో ఉన్నప్పుడు క్రీజులోకి వచ్చిన ఈ యువ కెరటం.. పంత్​, అక్షర్​తో కలిసి శతక భాగస్వామ్యాలు నిర్మించాడు. టీమ్​ఇండియా ఆధిక్యంలో కీలక పాత్ర పోషించాడు.

174 బంతుల్లో 10 ఫోర్లు, ఒక సిక్సర్​ సాయంతో 96 పరుగులు చేసిన సుందర్​.. తనదైన శైలిలో కళాత్మక షాట్లు ఆడాడు. ఇంగ్లింష్​ బౌలర్లను ధాటిగా ఎదుర్కొన్నాడు. డిఫెన్స్​కు ప్రాధాన్యమిస్తూనే.. చూడముచ్చటైన షాట్లతో ఆలరించాడు. గ్రౌండ్​ నలుమూలలా పరుగులు సాధించాడు. క్లాస్​ ఇన్నింగ్స్​తో ఆకట్టుకున్నాడు.

అయితే అప్పటివరకు సాఫీగానే సాగుతున్న సుందర్​ ఇన్నింగ్స్​ను అక్షర్​ రనౌట్​ మలుపు తిప్పింది. ఆ తర్వాత వచ్చిన ఇషాంత్​, సిరాజ్​లు వెంటవెంటనే ఔట్​ అయ్యారు. దీంతో ఈ యువ ఆటగాడికి సెంచరీ చేసే అవకాశం కొద్దిలో చేజారింది. శతకం మిస్​ అయినప్పటికీ.. జట్టుకు ఉపయుక్తమైన ఇన్నింగ్స్​ ఆడిన సుందర్​.. సెంచరీ చేసినట్లే లెక్క!

వీరూ ట్వీట్​..

సెంచరీ చేజారే అవకాశం కోల్పోయిన సుందర్​ను ప్రశంసిస్తూ సెహ్వాగ్​ ట్వీట్​ చేశాడు. 'శతకాన్ని కోల్పోయాడు కానీ.. తన క్లాస్​ బ్యాటింగ్​ను మాత్రం ప్రదర్శించాడు' అని వీరూ ట్వీట్ చేశాడు.

మరో వైపు సుందర్, ఇషాంత్​, సిరాజ్​లపై సామాజిక మాధ్యమాల్లో పలు మీమ్స్ ట్రెండ్ అవుతున్నాయి. 'ఇదొక గొప్ప ఇన్నింగ్స్​ సెంచరీ కంటే ఎక్కువ', 'టీమ్​ఇండియాకు దొరికిన భవిష్యత్ ఆణిముత్యం' అని వాషింగ్టన్​కు అభిమానులు మద్దతుగా నిలుస్తున్నారు.

ఇదీ చదవండి:స్విస్ ఓపెన్: సెమీస్​లోకి సాత్విక్​- చిరాగ్​ శెట్టి జోడీ