అంతర్జాతీయ క్రికెట్​కు స్టార్​ ఆల్​రౌండర్ వీడ్కోలు

దక్షిణాఫ్రికా స్టార్​ ఆల్​రౌండర్​​ జేపీ డుమిని క్రికెట్​లోని అన్ని ఫార్మాట్లకు వీడ్కోలు పలికాడు. సోమవారం ఈ నిర్ణయాన్ని ప్రకటించాడు. 2019 తర్వాత నుంచి లీగ్స్​ మాత్రమే ఆడుతున్నాడు.

ప్రపంచకప్​లో ఆశించిన ప్రదర్శన చేయలేకపోయిన దక్షిణాఫ్రికా... ఈ ఏడాది టీ20 వరల్డ్​కప్​ ముందు ఆ దేశ క్రికెట్​ను కాపాడుకునే చర్యలు చేపట్టింది. ఇందులో భాగంగా మాజీ సారథి గ్రేమ్​ స్మిత్​ను బోర్డు డైరెక్టర్​గా, మాజీ క్రికెటర్​ మార్క్​ బౌచర్​ను కోచ్​గా నియమించింది. ప్రస్తుతం స్టార్​ క్రికెటర్లు డివిలియర్స్​ వంటి ఆటగాళ్ల సేవలు వినియోగించుకునే ప్రయత్నం చేస్తోంది. ఇలాంటి సమయంలో ఊహించని షాకిచ్చాడు స్టార్​ ఆల్​రౌండర్​ జేపీ డుమిని. క్రికెట్‌లోని అన్ని ఫార్మాట్లకూ గుడ్‌బై చెప్తూ.. సోమవారం ప్రకటన చేశాడు.

దక్షిణాఫ్రికా స్టార్​ ఆల్​రౌండర్​​ జేపీ డుమిని

2018 ప్రపంచకప్​ ఆఖరు

గత ఏడాది వన్డే ప్రపంచకప్ తర్వాత అంతర్జాతీయ క్రికెట్ నుంచి తప్పుకున్న డుమిని.. ఆ తర్వాత పలు టీ20 లీగ్​ల్లో మాత్రమే ఆడుతున్నాడు. అయితే ఈ రోజు మాత్రం ఇకపై ఏ ఫార్మాట్‌లోనూ క్రికెట్ ఆడబోనంటూ ప్రకటించేశాడు. ఫలితంగా 15 ఏళ్ల క్రికెట్ కెరీర్​కు శాశ్వతంగా బ్రేక్​ పడింది.

చాలా ఏళ్లు మిడిలార్డర్‌లో రాణించిన ఇతడు... యువ క్రికెటర్లకు అవకాశమివ్వాలనే ఉద్దేశంతో క్రికెట్ నుంచి వైదొలుగుతున్నట్లు చెప్పాడు. డ్రెస్సింగ్​ రూమ్​లో బాగానే అనిపిస్తున్నా... మైదానంలో తన ప్రదర్శనపై అసంతృప్తిగా ఉన్నట్లు చెప్పాడు.

" నాలో ఇంకా ఆట ఆడే సత్తా ఉంది. టీ20 మ్యాచ్‌లు ఆడితే ఫ్రాంఛైజీలు పెద్ద మొత్తంలో డబ్బులు ఇస్తాయి. కానీ​ ఆడేందుకు బలమైన కారణంగా కనిపించట్లేదు. కాబట్టి అవకాశం కోసం ఎదురుచూస్తున్న యువ క్రికెటర్ల కోసం నేను వైదొలుగుతున్నా".
--జేపీ డుమిని, దక్షిణాఫ్రికా క్రికెటర్​

2004 ఆగస్టులో శ్రీలంకతో జరిగిన వన్డే సిరీస్‌తో అంతర్జాతీయ క్రికెట్‌లోకి అరంగేట్రం చేసిన డుమిని.. దక్షిణాఫ్రికా తరఫున 46 టెస్టులు, 199 వన్డేలు, 81 టీ20 మ్యాచ్‌లు ఆడాడు.