టీమిండియా మాజీ కెప్టెన్ సౌరభ్ గంగూలీ.. భారత క్రికెట్ నియంత్రణ మండలి(బీసీసీఐ) నూతన అధ్యక్షుడిగా నేడు బాధ్యతలు స్వీకరించనున్నాడు. అయితే దాదా.. ఈ అత్యున్నత పదవిని ఎలా నిర్వహిస్తాడనే విషయంపై సర్వత్రా ఆసక్తిగా నెలకొంది. అసలు బీసీసీఐ అధ్యక్షుడికి ఎలాంటి అధికారాలు ఉంటాయి? భారత క్రికెట్లో అతడు ఎలాంటి పాత్ర పోషిస్తాడో ఇప్పుడు తెలుసుకుందాం.
- బీసీసీఐ విధులు, అధికారాల నిబంధనల ప్రకారం.. రాష్ట్ర క్రికెట్ సంఘాల అధ్యక్షులు, సభ్యులతో సమావేశాలు నిర్వహించాలి. బీసీసీఐ ఆర్థిక వ్యవహారాల వార్షిక ఖాతాలకు ఆడిటింగ్ నిర్వహించి సంతకాలు చేయాలి.
- భారత్ క్రికెట్ కోసం ప్రామాణిక విధానాలకు రూపకల్పన చేయాలి. వాటి అమలుకు కృషి చేయాలి. అవసరమైన ప్రణాళికలు, సూచనలు, నిబంధనలు, నియంత్రణలను రూపొందించాలి. జవాబుదారీతనం, పారదర్శకత, సమగ్రత లాంటి విలువలను భారత ఆటగాళ్లు, అభిమానుల్లో పెంపొందించాలి.
- భారత క్రికెట్ అభివృద్ధి కోసం అవసరమైన ప్రచారం కల్పించాలి. క్రియాశీలక మార్పులు చేపట్టాలి. ఆటగాళ్ల సంక్షేమం, ఆసక్తి మేరకు వారికి దోహదపడాలి. ఎవరైనా నిబంధనలు అతిక్రమిస్తే, క్రమశిక్షణ చర్యలు తీసుకోవాలి.
- టోర్నీలు, ఎగ్జిబిషన్ మ్యాచ్లు, అంతర్జాతీయ టెస్టులు, వన్డేలు, టీ20లు నిర్వహించేందుకు అవసరమైన ప్రణాళికలు రూపొందించాలి. కోచింగ్ అకాడమీలు ఏర్పాటు చేయాలి.
- క్రికెటర్లలో క్రీడాస్ఫూర్తి, వృత్తినిబద్దతను పెంపొందించి.. వాటి పరిరక్షణ కోసం పాటుపడాలి. పాలనను సమర్థమంతంగా నిర్వహించాలి. క్రికెటర్లు, జట్టు సభ్యులు, అంపైర్లు, పాలనాధికారులు తదితరులు పారదర్శకంగా ఉండేలా చూస్తూ.. వారు నైతిక విలువలను పాటించేలా కృషి చేయాలి.
- డోపింగ్, లైంగిక వేధింపులు, వయసు విషయంలో మోసాలు, వివక్ష, అన్యాయాలు లాంటి అంశాలను నిరోధించాలి.
- రాష్ట్ర, ప్రాంతీయ క్రికెట్ సంఘాలు, ఇతర ప్రైవేటు వ్యవస్థలు నిర్వహిస్తోన్న టోర్నీలు ప్రోత్సహించాలి. సభ్యులు, సంఘాల పనితీరులో ఏకరూపత సాధించడం కోసం నిబంధనలు తయారు చేయాలి.
- ఇతర దేశాల్లో పర్యటనలు, ఐసీసీ జట్లు మన దేశంలో పర్యటించడం, టోర్నీలకు ఆతిథ్యమివ్వడం లాంటివి ఎప్పటికప్పుడూ క్రమబద్దీకరిస్తూ ఉండాలి. వాటిని ఏర్పాటు చేయడమే కాకుండా నియంత్రించే అధికారమూ బీసీసీఐ అధ్యక్షుడికి ఉంది.