ఈ ఏడాది ఐపీఎల్ ఎప్పుడూ లేనంత భిన్నంగా జరగనుంది. కరోనా కారణంగా సీజన్ మొత్తం యూఏఈలో నిర్వహించనున్నారు. ఈ విధంగా జరగడం ఇదే తొలిసారి. మరోవైపు దుబాయ్ చేరుకున్న ఆటగాళ్లంతా బయో బబుల్లో ఉన్నారు. క్రమం తప్పకుండా వారికి కరోనా పరీక్షలు నిర్వహిస్తున్నారు. ఆటగాళ్లు సురక్షితంగా ఉండేందుకు బీసీసీఐ అన్ని చర్యలు తీసుకుంటోంది. అయితే, ముంబయి ఇండియన్స్ జట్టు క్రికెటర్ల రక్షణ కోసం మరో స్మార్ట్ పద్దతిని ప్రవేశపెట్టింది. జట్టులోని ప్రతి ఆటగాడు వ్యక్తిగత ఆరోగ్య ట్రాకింగ్ పరికరాన్ని ధరించేలా ఏర్పాట్లు చేసింది. ముంబయి జట్టు సభ్యులు ఈ పరికరాలను ధరించిన ఫొటోలను ఫ్రాంచైజీ ట్విట్టర్లో పంచుకుంది.
ఇప్పటికే బీసీసీఐ ఆటగాళ్లకు బ్లూటూత్- ఎనేబుల్డ్ కాంటాక్ట్ ట్రేసింగ్ పరికరాన్ని అందజేసింది. రోజూవారి ఫిట్నెస్ను దీని ద్వారా తెలుసుకోనుంది. అయితే, ముంబయి జట్టు స్మార్ట్ పద్దతితో వారి రక్షణకు మరింత బలం చేకూరినట్లైంది. కరోనా వ్యాప్తిని తగ్గించడంలో ఇది ఎంతో సమర్థవంతంగా పనిచేస్తుంది.
"ఈ పరికరం మన హృదయ స్పందన, శ్వాస, శరీర ఉష్టోగ్రత తదితర వివరాలను పర్యవేక్షిస్తుంది. ఏదైనా అనారోగ్య సమస్యలు ఏర్పడితే ముందుగానే పసిగడుతుంది. తద్వారా లక్షణాలు లేని కేసులను ముందుగానే గుర్తించి పరిష్కరించవచ్చు. నేషనల్ బాస్కెట్బాల్ అసోసియేషన్ ఇలాంటి పరికరాన్నే ఉపయోగించింది."