అంతర్జాతీయ క్రికెట్ మండలి (ఐసీసీ) ఛైర్మన్ పదవి నుంచి శశాంక్ మనోహర్ వైదొలగడం మంచి ఆలోచన అని భారత క్రికెట్ నియంత్రణ మండలి (బీసీసీఐ) మాజీ అధ్యక్షుడు ఎన్.శ్రీనివాసన్ తెలిపారు. రెండేళ్లు ఆ పదవిలో కొనసాగిన శశాంక్ బుధవారం వైదొలిగినట్లు ఐసీసీ ప్రకటించింది. డిప్యూటీ ఛైర్మన్ ఇమ్రాన్ ఖ్వాజా తాత్కాలికంగా ఆ బాధ్యతలు నిర్వర్తిస్తాడని బోర్డు స్పష్టం చేసింది. దీనిపై బీసీసీఐ మాజీ అధ్యక్షుడు ఎన్.శ్రీనివాసన్ స్పందించారు.
"భారత క్రికెట్కు అతడు (శశాంక్ మనోహర్) ఎంత నష్టం చేశాడో నాకు తెలుసు. ఇప్పుడు తాను ఆ పదవి నుంచి వైదొలగడం వల్ల ప్రతి వ్యక్తి ఎంతో సంతోషంగా ఉంటారు. ఆటలో భారతదేశ ఆర్థిక వ్యవస్థను, ఐసీసీలో మన దేశ వ్యవస్థను దెబ్బతీశాడు. అతడు భారత వ్యతిరేకిగా.. ప్రపంచ క్రికెట్లో దేశ ప్రాముఖ్యాన్ని తగ్గించాడు. ఇప్పుడు అతడు పారిపోతున్నాడు. ఎందుకంటే ప్రస్తుత భారత నాయకత్వం నుంచి ఎలాంటి సహకారం లభించదని అతడికి అర్థమైంది".