చంపేస్తానంటూ బంగ్లాదేశ్​ క్రికెటర్​కు బెదిరింపులు

బంగ్లాదేశ్​ క్రికెటర్​ షకీబ్​ను హత్య చేస్తానని ఫేస్​బుక్​ లైవ్​లో​ బెదిరించాడు ఓ నెటిజన్. కోల్​కతాలో కాళీ పూజలో పాల్గొన్నాడనేదే ఇందుకు కారణంగా తెలుస్తోంది. అయితే ఈ విషయమై పోలీసులు దర్యాప్తు చేపట్టారు.

బంగ్లాదేశ్​ ఆల్​రౌండర్​ షకీబ్​ అల్​ హసన్​.. పరమత ఆరాధన చేశాడని ఆరోపిస్తూ, అతడ్ని చంపుతానని​ బెదిరింపులకు పాల్పడ్డాడు ఓ నెటిజన్. షకీబ్ ప్రవర్తన ముస్లింలను బాధించేలా ఉందని మొహిసిన్​ తాలూక్దర్​ ఫేస్​బుక్​ లైవ్​లో పేర్కొన్నాడు. ఖడ్గంతో షకీబ్​ను ముక్కలు చేస్తానని అన్నాడు. అవసరమైతే షకీబ్​ను చంపడానికి సిల్హెట్​ నుంచి ఢాకా వరకు నడుచుకుంటూ వస్తానని చెప్పాడు.

పూజలో పాల్గొన్నందుకే..

కోల్​కతాలో జరిగిన కాళీ పూజలో షకీబ్​ పాల్గొన్నాడనే కారణంతోనే నెటిజన్​ బెదిరించినట్లు తెలుస్తోంది. "ఈ విషయం మాకు ఇప్పుడే తెలిసింది. వీడియో లింక్​ను సైబర్​ ఫోరెన్సిక్​ బృందానికి అప్పగించాం. త్వరలోనే చట్టపరమైన చర్యలు తీసుకుంటారు" అని సిల్హెట్​ అదనపు డిప్యూటీ కమిషనర్​ బి.ఎం.అష్రఫ్​ ఉల్లా తెలిపారు.

వీడియోలు తొలగించారు

ఆ వీడియో పోస్ట్​ చేసిన తర్వాత తన చర్యలకు క్షమాపణలు కోరుతూ.. మొహిసిన్ మరో లైవ్​ వీడియో షేర్​ చేశాడు. షకీబ్​తో సహా ప్రముఖులందరూ సరైన మార్గాన్ని అనుసరించాలని సూచించాడు. అయితే మొహిసిన్​ పోస్ట్​ చేసిన రెండు వీడియోలను ఫేస్​బుక్​ తొలగించింది.

కాళీ పూజ కోసం కోల్​కతాకు

బెలీఘట్ ప్రాంతంలో కాళీ పూజ సందర్భంగా క్రికెటర్​ షకీబ్​ అల్​ హసన్ కోల్​కతాకు గురువారం వెళ్లాడు. ఆ విగ్రహానికి ప్రార్థన కూడా చేశాడు. పూజ పూర్తయిన తర్వాత విమానంలో బంగ్లాదేశ్​కు తిరిగి వచ్చాడు. ఐసీసీ షకీబ్​పై విధించిన రెండేళ్ల నిషేధం ఈ ఏడాది అక్టోబరు 29తో పూర్తయ్యింది. ​