పాకిస్థాన్ యువ బౌలర్ షాహిన్ అఫ్రిదీ విజృంభించాడు. నిప్పులు చెరిగే బంతులతో ప్రత్యర్థి బ్యాట్స్‌మెన్‌ను హడలెత్తించాడు. నాలుగు బంతుల్లో నాలుగు వికెట్లు నేలకూల్చాడు. ఇంగ్లాండ్ కౌంటీలో భాగంగా హాంప్షైర్, మిడిల్సెక్స్ మధ్య ఆదివారం టీ20 మ్యాచ్ జరిగింది. అందులో షాహిన్ 6/19తో రెచ్చిపోయాడు. జాన్‌ సింప్సన్‌, స్టీవెన్‌ ఫిన్‌, తిలాన్‌, టిమ్‌ ముర్తాఘ్‌ను వరుస బంతుల్లో పెవిలియన్‌ చేర్చి రికార్డు సృష్టించాడు. అఫ్రిదీ దెబ్బకు మిడిల్సెక్స్ బ్యాటింగ్‌ లైనప్‌ కుప్పకూలింది.
నాలుగు బంతుల్లో నాలుగు వికెట్లు.. పాక్ బౌలర్ రికార్డు
ఇంగ్లాండ్ టీ20 బ్లాస్ట్ టోర్నీలో పాకిస్థాన్ యువ బౌలర్ షాహిన్ అఫ్రిదీ రెచ్చిపోయాడు. హాంప్షైర్ తరఫున ఆడుతున్న ఇతడు మిడిల్సెక్స్తో జరిగిన మ్యాచ్లో నాలుగు బంతుల్లో నాలుగు వికెట్లు తీశాడు.
షాహిన్
తొలుత బ్యాటింగ్‌ చేసిన హాంప్షైర్ నిర్ణీత 20 ఓవర్లకు 9 వికెట్లు కోల్పోయి 141పరుగులు చేసింది. ఛేదనలో మిడిల్సెక్స్ బ్యాట్స్‌మెన్‌ తడబడటం వల్ల 121 పరుగులు మాత్రమే చేయగలిగింది. షాహిన్ అఫ్రిదీకి మ్యాన్‌ ఆఫ్‌ ది మ్యాచ్ దక్కింది.
పాకిస్థాన్ తరఫున టీ20ల్లో వరుస బంతుల్లో 4 వికెట్లు తీసిన తొలి బౌలర్‌గా షాహిన్ రికార్డు సృష్టించాడు. మొత్తంగా చూసుకుంటే మూడో బౌలర్. ఇంతకుముందు శ్రీలంక బౌలర్ లసిత్‌ మలింగ, అఫ్గానిస్థాన్‌ స్పిన్నర్‌ రషీద్‌ఖాన్‌ ఈ ఘనత సాధించారు. కాగా.. నాలుగు వికెట్లలో నాలుగు క్లీన్‌ బౌల్డ్‌లే ఉండటం విశేషం.