వైరల్: ఈ విధంగా కూడా బౌలింగ్ చేస్తారా..!

ఇటీవల ప్రారంభమైన బంగ్లాదేశ్​ ప్రీమియర్ లీగ్​ ఆరంభ మ్యాచ్​లో సిలెట్ థండర్ బౌలర్ క్రిషమర్ సంతోకి వేసిన నోబాల్, వైడ్ చర్చనీయాంశమయ్యాయి. అనుమానంగా ఉన్నాయంటూ నెటిజన్లు సామాజిక మాధ్యమాల్లో పోస్టులు పెడుతున్నారు.

ఓ అంగుళం క్రీజు దాటి బౌలింగ్ చేస్తేనే అది నోబాల్ అని అందరికి తెలుసు.. అలాంటిది దాదాపు అడుగు దూరం వరకు క్రీజు దాటి బౌలింగ్ చేశాడు ఓ ఆటగాడు. అంతేకాదు అతడు వేసిన ఓ వైడ్​ను కీపర్ డైవ్ చేసి మరీ పట్టుకున్నాడు. ఇటీవల ప్రారంభమైన బంగ్లాదేశ్ ప్రీమియర్​ లీగ్​లో ఓ బౌలర్ ఈ విధంగా బౌలింగ్ చేసి నవ్వు తెప్పించడమే కాదు.. అనుమానాలకూ తావిచ్చాడు.

చట్టాగ్రామ్ ఛాలెంజెర్స్​తో జరిగిన మ్యాచ్​లో సిలెట్ థండర్​ బౌలర్ క్రిష్​మర్​ సంతోకి ఈ విధంగా బౌలింగ్ చేసి ఆశ్చర్యపరిచాడు. అతడి ప్రదర్శన చూసి 'ఈ రకంగా కూడా బౌలింగ్ వేస్తారా' అని నెటిజన్లు సందేహిస్తున్నారు. కాగా.. 'అనుమానాస్పద బౌలింగ్' అని కొంతమంది పోస్టులు పెడుతున్నారు. అతడు వేసిన బంతి.. టెస్టుల్లో కూడా వైడ్​ ఇచ్చేంతలా ఉంది.

ఈ అంశంపై విచారణకు ఆదేశించామని సిలెట్ థండర్ జట్టు డైరెక్టర్ తంజిల్ చౌదురి తెలిపాడు. సంతోకి స్పాట్​ ఫిక్సింగ్ పాల్పడ్డాడా? లేదా ఎవరి ప్రమేయమైనా ఉందా? అనే కోణంలో దర్యాప్తు చేస్తామని అన్నాడు.

ఈ మ్యాచ్​లో సిలెట్ థండర్ 5 వికెట్ల తేడాతో ఓటమి పాలైంది. ఆ జట్టు నిర్దేశించిన 162 పరుగుల లక్ష్యాన్ని ఓవర్ మిగిలుండగానేపూర్తి చేసింది చట్టాగ్రామ్ ఛాలెంజర్స్​. సంతోకి 4 ఓవర్లు బౌలింగ్ చేసి 34 పరుగులిచ్చి ఓ వికెట్ తీశాడు. అందులో ఓ నోబాల్​తో పాటు 4 వైడ్లు వేశాడు.

ఇదీ చదవండి: వైరల్​: 4.5 సెకండ్లలోనే బాస్కెట్లో బంతి..!