పంత్​కు ఎక్కువ అవకాశాలు రావడానికి కారణమదే!

భారత జట్టులో సంజూ శాంసన్ కంటే పంత్​కు అవకాశాలు ఎక్కువ రావడానికి గల కారణాలు వెల్లడించాడు సంజూ కోచ్ బిజూ. దీనితో పాటు పలు విషయాలను ఓ ఇంటర్వ్యూలో పంచుకున్నారు.

యువ వికెట్​కీపర్ రిషభ్ పంత్​.. ఎడమ చేతి బ్యాట్స్​మన్ అయిన కారణంగా అతడికి జట్టులో చాలా అవకాశాలు దక్కాయని అభిప్రాయపడ్డాడు సంజూ శాంసన్ కోచ్ బిజూ జార్జ్. అయితే తన శిష్యుడు ప్రతిభను దగ్గర నుంచి చూసిన వ్యక్తిగా అతడికి మరిన్ని అవకాశాలు ఇచ్చుండాల్సిందని అన్నాడు. ఇటీవలే జరిగిన ఓ ఇంటర్వ్యూలో ఈ విషయాలన్నీ మాట్లాడాడు బిజూ.

"సంజూను దగ్గర నుంచి చూశాను కాబట్టి నాకు తెలుసు. అతడికి టీమ్​ఇండియాలో మరిన్ని అవకాశాలు ఇచ్చుంటే బాగుండేదని నా అభిప్రాయం. మేనేజ్​మెంట్ వైపు నుంచి చూస్తే పంత్​కు ఎక్కువ ఛాన్స్​లు ఇచ్చారు. ఇందుకు కారణాలు చాలానే ఉన్నాయి. అతడు ఎడమ చేతివాటం బ్యాట్స్​మన్ కావడం, అలానే లెఫ్టార్మ్ స్పిన్నర్లు, లెగ్​ స్పిన్నర్లు ఉన్న జట్లతో ఆడాల్సి ఉండటం మరో కారణం అయ్యుండొచ్చు. ప్రత్యర్థిని ఎదుర్కొనే జట్టేదో కోచ్, కెప్టెన్ నిర్ణయిస్తారు. ఎవరూ ఉద్దేశపూర్వకంగా తప్పించాలని చూడరు"అని బిజూ జార్జ్ అన్నాడు.

యువ క్రికెటర్ సంజూ శాంసన్

2015లో అంతర్జాతీయ కెరీర్​ ప్రారంభించిన సంజూ శాంసన్.. తర్వాతి అవకాశం కోసం నాలుగేళ్లు ఎదురుచూడాల్సి వచ్చింది. గతేడాది బంగ్లాదేశ్​తో టీ20 సిరీస్​కు ఎంపికైనా తుదిజట్టులో చోటు దక్కకపోవడంపై చాలా చర్చే జరిగింది. ఈ జనవరిలో శ్రీలంక సిరీస్​కు ఎంపికైనా సరే కేవలం 8,2 పరుగులే చేసి నిరాశపరిచాడు సంజూ.

ప్రస్తుతం పంత్, సంజూ జట్టులో లేకపోవడం వల్ల ధోనీ తాత్కాలిక విరామంలో ఉండటం వల్ల కీపింగ్ బాధ్యతలు కేఎల్ రాహుల్ చూసుకుంటున్నాడు.