సచిన్ తెందుల్కర్ తన తొలి అంతర్జాతీయ మ్యాచ్ పాకిస్థాన్ తరఫున ఆడాడని మీకు తెలుసా! అఫ్రిదీ.. మాస్టర్ బ్యాట్తోనే రికార్డు సెంచరీ చేశాడు. థర్డ్ అంపైర్ ఔటిచ్చిన తొలి బ్యాట్స్మెన్ సచినే.. ఇలాంటి ఆసక్తికర విషయాలు ఇప్పుడు చూద్దాం! నేడు మాస్టర్బ్లాస్టర్ పుట్టినరోజు సందర్భంగా వీటిపై ఓ లుక్కేయండి.
పాకిస్థాన్ తరఫున తొలి అంతర్జాతీయ మ్యాచ్!
1989లో పాక్తో సచిన్ తన తొలి అంతర్జాతీయ మ్యాచ్ ఆడాడని అందరికీ తెలుసు. కానీ అంతకంటే ముందు 1987లో ఇండియా - పాకిస్థాన్ మధ్య జరిగిన ఓ ఎగ్జిబిషన్ మ్యాచ్లో సచిన్ ఆడాడు. కానీ.. పాక్ తరఫున. అయితే.. అది సబ్స్టిట్యూట్ ఫీల్డర్గానే. ఈ విషయాన్ని సచిన్ తన పుస్తకం 'ప్లేయింగ్ ఇట్ మై వే' లో తెలిపాడు.
థర్డ్ అంపైర్ ఔటిచ్చిన తొలి బ్యాట్స్మెన్ సచినే..
1992లో దక్షిణాఫ్రికా టెస్టు సిరీస్లో సచిన్ ఔట్ను థర్డ్ అంపైర్ ఇచ్చాడు. క్రీజులో సచిన్, రవిశాస్త్రి ఉన్నారు. సౌతాఫ్రికా బౌలర్ మెక్మిలన్ బౌలింగ్లో సచిన్ రిస్కీ సింగిల్ కోసం ప్రయత్నించగా.. రవిశాస్త్రి వద్దని వెనక్కి పంపాడు. ఫీల్డింగ్ దిగ్గజం జాంటీ రోడ్స్ అవకాశం కోసం స్టంప్స్ దగ్గర వేచి ఉన్నాడు. ఆండ్రూ హడ్సన్ బంతిని రోడ్స్కు విసిరాడు. వెంటనే స్టంప్స్ను గిరాటేశాడు జాంటీ. లెగ్ అంపైర్ సైరిల్ అనుమానంతో థర్డ్ అంపైర్కి సిఫార్సు చేశాడు. థర్డ్ అంపైర్ కార్ల్ లియన్ బర్గ్ ఆధునిక సాంకేతికత సాయంతో సచిన్ని ఔట్గా తేల్చాడు. అప్పటివరకు అంపైర్లే రనౌట్ ఇచ్చేవాళ్లు. సాంకేతిక పరిజ్ఞానం రాకతో రనౌట్ను థర్డ్ అంపైర్కు నివేదిస్తున్నారు.
సచిన్ బ్యాట్తో రికార్డు సెంచరీ చేసిన అఫ్రిదీ..
మొన్నటి వరకు ప్రపంచంలో వేగవంతమైన శతకం చేసింది ఎవరంటే షాహిద్ అఫ్రిదీ అని టక్కున చెప్పేస్తారు. కానీ సచిన్ తెందుల్కర్ బ్యాట్తో షాహిద్ ఆ సెంచరీ చేశాడు. 1996లో శ్రీలంకతో జరిగిన మ్యాచ్లో షాహిద్ 37 బంతుల్లోనే 100 పరుగులు చేశాడు. అప్పుడే జట్టులోకి వచ్చిన అఫ్రిదీకి క్రికెట్ కిట్ కూడా లేదు. పాక్ స్పిన్నర్ ముస్తాక్ బూట్లు, హెల్మెట్ షాహిద్కివ్వగా.. వకార్ యూనిస్ నెట్ ప్రాక్టీస్ సమయంలో బ్యాట్ ఇచ్చాడు. అనంతరం సచిన్ ఇచ్చిన బ్యాట్తో 'శత'క్కొట్టాడు. తర్వాత ఈ విషయాన్ని అఫ్రిదీయే స్వయంగా చెప్పాడు.
సెంచరీ చేసినా సంబురం చేసుకోలేదు..
సాధారణంగా శతకాలు చేసినపుడు బ్యాట్స్మెన్ సంబురాలు చేసుకోవడం మనం చూసే ఉంటాం. మైదానంలోనే కాకుండా బయట కూడా వేడుకలా చేసుకుంటారు. అలాగే 1990లో ఇంగ్లండ్పై సచిన్ తన తొలి టెస్టు సెంచరీ చేశాడు. మ్యాగ్నమ్ షాంపైన్ బాటిల్ బహుమతిగా పొందాడు. కానీ బ్రిటీష్ నిబంధనల ప్రకారం 18 ఏళ్ల లోపు వారు ఆల్కహాల్ సేవించకూడదు. ఈ కారణంగా తన తొలి సెంచరీ ఆనందాన్ని ఆస్వాదించలేకపోయాడు సచిన్. అప్పటికీ తన వయసు 17ఏళ్లే.
