బుమ్రా కొట్టిన షాట్​కు ఆసీస్ బౌలర్​ విలవిల

సిడ్నీ వేదికగా ఆస్ట్రేలియా-ఎ, టీమ్​ఇండియా-ఎ మధ్య జరుగుతోన్న రెండో సన్నాహక మ్యాచ్​లో ఓ అనూహ్య పరిణామం చోటు చేసుకుంది. ఆసీస్​ బౌలర్​ కామెరూన్​ గ్రీన్​ తలకు బంతి బలంగా తాకడం వల్ల ఉన్నచోటనే కుప్పకూలిపోయాడు. గాయం కారణంగా మ్యాచ్​ నుంచి తప్పుకున్న గ్రీన్​ స్థానంలో పాట్​ రోను క్రికెట్​ ఆస్ట్రేలియా బరిలో దింపింది.

ఆస్ట్రేలియా-ఎ జట్టుతో జరుగుతోన్న మూడు రోజుల ప్రాక్టీస్‌ మ్యాచ్‌లో టీమ్​ఇండియా బ్యాట్స్‌మన్‌ విఫలమైనా.. పేసర్​ జస్‌ప్రీత్‌ బుమ్రా అర్ధసెంచరీతో అలరించాడు. ఈ క్రమంలో బుమ్రా.. కామెరూన్ గ్రీన్ బౌలింగ్‌లో స్ట్రెయిట్ డ్రైవ్ ఆడాడు. ఆ బంతి పొరపాటున గ్రీన్‌ తలకు బలంగా తాకింది. ఫలితంగా నొప్పితో విలవిల్లాడిన గ్రీన్‌ పిచ్‌లోనే కూలబడ్డాడు. దీంతో నాన్‌స్ట్రైకింగ్‌ ఎండ్‌లో ఉన్న మహ్మద్‌ సిరాజ్ తన బ్యాట్‌ను పడేసి పరుగు పూర్తి చేయకుండా అతని వద్దకు పరిగెత్తాడు. అంపైర్‌ వెంటనే ఫిజియోను రప్పించడం వల్ల మైదానంలో కాసేపు హైటెన్షన్‌ వాతావరణం నెలకొంది. అయితే అదృష్టవశాత్తు గ్రీన్‌కు పెద్ద గాయం కాకపోవడం వల్ల ఓవర్‌ను పూర్తి చేశాడు. ప్రస్తుతం ఈ వీడియో సోషల్‌ మీడియాలో వైరల్‌గా మారింది.

సబ్​స్టిట్యూట్​గా పాట్​ రో

అయితే ఈ గాయం తర్వాత కామెరూన్​ గ్రీన్​ స్థానంలో పాట్​ రో కంకషన్ సబ్​స్టిట్యూట్​గా క్రికెట్​ ఆస్ట్రేలియా బరిలో దించింది. గ్రీన్​ ప్రస్తుతం వైద్యల పర్యవేక్షణలో ఉన్నాడని.. శనివారం అతని ఆరోగ్య పరిస్థితిపై అప్​డేట్​ ఇస్తామని సీఏ పేర్కొంది.

తేలిపోయిన భారత్​ బ్యాట్స్​మెన్​

టాస్‌ గెలిచి బ్యాటింగ్‌ ఎంచుకున్న టీమ్​ఇండియా ఆదినుంచే తడబడుతూ ఆడింది. ఓపెనర్​ పృథ్వీషా (40), వన్​డౌన్​​ బ్యాట్స్​మన్​ శుభ్​మన్​ గిల్​ (43) పర్వాలేదనిపించినా.. మిగిలిన బ్యాట్స్​మెన్​ పరుగులను రాబట్టడంలో విఫలమయ్యారు. వృద్ధిమాన్​ సాహా, మహ్మద్​ షమీ డకౌట్​గా వెనుదిరిగారు. అయితే ఈ మ్యాచ్​లో అనూహ్యంగా పేసర్​ జస్​ప్రీత్​ బుమ్రా అర్ధశతకంతో అలరించాడు. ఈ మ్యాచ్​లో కేవలం 57 బంతులను ఆడిన బుమ్రా.. ఆరు ఫోర్లు, రెండు సిక్సర్లతో 55 పరుగులు చేశాడు. అంతర్జాతీయ క్రికెట్​లో తన తొలి హాఫ్​సెంచరీని నమోదు చేసుకుని నాటౌట్​గా నిలిచాడు. దీంతో ఈ మ్యాచ్​లో 194 పరుగులకే టీమ్​ఇండియా ఆలౌటైంది.

ఇదీ చూడండి:బుమ్రా తొలి హాఫ్​సెంచరీ.. భారత్ 194 ఆలౌట్