'అతడు ఆడుతుంటే దేవుడిలా కనిపిస్తున్నాడు'

కివీస్​ జట్టు చెందిన రాస్ టేలర్.. అమోఘంగా బ్యాటింగ్ చేస్తున్నాడని ప్రశంసించాడు శార్దుల్ ఠాకుర్. అతడు లెగ్ సైడ్ ఆడుతుంటే దేవుడిలా కనిపిస్తున్నాడని అన్నాడు.

భారత్-న్యూజిలాండ్​ మధ్య నామమాత్ర మూడో వన్డే మంగళవారం జరగనుంది. ఈ నేపథ్యంలో ఆసక్తికర వ్యాఖ్యలు చేశాడు టీమిండియా బౌలర్ శార్దుల్ ఠాకుర్. ప్రతి మ్యాచ్​ తమకు ముఖ్యమైనదేనని, అయితే వన్డే సిరీస్​ ఓడిపోవడానికి కారణం ప్రత్యర్థి జట్టు బ్యాట్స్​మన్ రాస్ టేలర్ అని అన్నాడు.

"ప్రతి మ్యాచ్​ ముఖ్యమైనదే. వరుసగా రెండు వన్డేలు ఓడి, సిరీస్​ కోల్పోయాం. అయినా చివరి మ్యాచ్​కు ప్రాధాన్యత ఉంటుంది. స్వేచ్ఛగా ఈ పోరుకు సిద్ధమవుతున్నాం. ఇందులో గెలిచి మేమేంటో నిరూపించుకుంటాం. కివీస్ సిరీస్​ గెల్చుకోవడంలో రాస్ టేలర్​ది కీలక పాత్ర. అతడి బ్యాటింగ్ చేస్తున్న తీరు మతిపోగొడుతుంది. ప్రధానంగా టేలర్.. లెగ్​సైడ్ ఆడేటప్పుడు దేవుడు ఆడుతున్నట్లు ఉంటుంది. అతడ్ని ఎంత తొందరగా పెవిలియన్​కు పంపిస్తే, అంత పైచేయి సాధించే వీలుంటుంది" -శార్దుల్ ఠాకుర్, టీమిండియా బౌలర్

ఇప్పటికే 2-0 తేడాతో సిరీస్​ కోల్పోయిన టీమిండియా.. ఈ మ్యాచ్​లో కచ్చితంగా గెలిచి తీరాలని భావిస్తోంది. తర్వాత రెండు టెస్టుల సిరీస్​ జరగనుంది. అంతకు ముందు జరిగిన టీ20 సిరీస్..​ 5-0 తేడాతో సొంతం చేసుకుంది కోహ్లీసేన.