హిట్​మ్యాన్​కు బర్త్​డే శుభాకాంక్షల వెల్లువ

చూడటానికి ముద్దుగా, బొద్దుగా ఉండే రూపం. కానీ బ్యాట్​ పడితే ఉగ్రరూపం. అందుకే భారతీయ క్రికెట్​ అభిమానులు హిట్​మ్యాన్​గా పిలుచుకుంటారు. ఆ బ్యాట్స్​మన్​ కొట్టే అలవోక సిక్సులకు ముగ్ధుడవని ప్రేక్షకుడు ఉండడు. అతడే టీమిండియా ఓపెనర్​ రోహిత్​శర్మ. నేడు 32వ పుట్టినరోజు జరుపుకొంటున్నాడు. ఈ సందర్భంగా కొన్ని ఆసక్తికర విషయాలు...

అతడు బ్యాట్​ ఝుళిపిస్తే ప్రత్యర్థి ఓటమి ఒప్పుకోవాల్సిందే. అతడు కొట్టే సిక్సులకు బౌండరీల హద్దులు చెరిగిపోవాల్సిందే. అందుకే అతడి ఖాతాలో లెక్కలేనన్ని విజయాలు. ఓపెనింగ్​లో అతడు ఆడితే టీమిండియాకు భరోసా. సొగసైన షాట్లు.. ఆడితే అవతలి ఆటగాళ్ల గుండెల్లో గుబులు పుట్టించగలిగే నైజం. అతడే టీమిండియా ఓపెనర్​ రోహిత్ శర్మ. నేడు (ఏప్రిల్ 30) 32వ పుట్టినరోజు జరుపుకొంటున్నాడు. ఈ సందర్భంగా క్రికెటర్లు, అభిమానులు సామాజిక మాధ్యమాల వేదికగా శుభాకాంక్షలు తెలియజేస్తున్నారు.

1987లో ఏప్రిల్​ 30న మహరాష్ట్రలోని నాగ్​పూర్​లో పుట్టాడీ డాషింగ్​ బ్యాట్స్​మెన్​. 2015లో రితికను వివాహం చేసుకున్నాడు రోహిత్​. వీరిద్దరికీ సమైరా అనే కూతురు ఉంది.

భార్య రితిక, కూతురు సమైరా

రికార్డుల రారాజు...

వన్డేల్లో మూడు డబుల్‌ సెంచరీలు... అత్యధిక వ్యక్తిగత స్కోరు (264) సాధించిన ఆటగాడిగా రికార్డు సాధించాడు. టెస్టు, వన్డే, టీ20 ఇలా అన్ని ఫార్మాట్లలో శతకాలు బాదిన మూడో భారత ఆటగాడు రోహిత్​.

రోహిత్​ ఇన్నింగ్స్​

వేగానికి మారుపేరు... రో'హిట్​'

పొట్టి క్రికెట్​ టీ20ల్లో వేగవంతమైన శతకం కొట్టాడు రోహిత్​శర్మ.​ వన్డేల్లో అత్యధిక సిక్సులు కొట్టిన వీరుడు. టీ20ల్లో ఇప్పటి వరకు 4 శతకాలు చేసి మొదటిస్థానంలో ఉన్నాడు. అంతేకాకుండా ముంబయి జట్టుకు సారథిగా 3 ఐపీఎల్​ ట్రోఫీలను అందించాడు.

32 నాటౌట్​ వర్సెస్​ కోల్​కతా నైట్​రైడర్స్​

2009 ఐపీఎల్​ మ్యాచ్​... కోల్​కతాపై గెలవాలంటే రోహిత్​ ప్రాతినిధ్యం వహిస్తోన్న డెక్కన్​ ఛార్జర్స్ జట్టుకు చివరి ఓవర్​లో 21 పరుగులు అవసరం. అప్పుడు బౌండరీలే హద్దుగా చెలరేగి మోర్తజా బౌలింగ్​ను చిత్తుచిత్తు చేశాడు రోహిత్​. మనోడి దెబ్బకు ఒక్క ఓవర్​లో 26 పరుగులు వచ్చాయి. విజయం లభించింది. ఇప్పటివరకు ఐపీఎల్​లో అత్యుత్తమ ఛేదనగా ఈ మ్యాచ్​ రికార్డు సృష్టించింది.

209 వర్సెస్​ ఆస్ట్రేలియా

2013లో బెంగళూరులో ఆస్ట్రేలియా-భారత్​ మధ్య పోరు​. ఈ మ్యాచ్​లో 158 బంతుల్లో 209 పరుగులతో వన్డేల్లో డబుల్​ సెంచరీ సాధించాడు. ఈ మ్యాచ్​లో ఏకంగా 16 సిక్స్​లు బాదేశాడు. మనోడి దెబ్బకు ప్రత్యర్థి ముందు 383 పరుగుల భారీ లక్ష్యం ఉంచింది. ఈ మ్యాచ్​లో 57 పరుగుల తేడాతో ఓడిపోయింది ఆసీస్​. ఫలితంగా 3-2తో సీరీస్ కైవసం చేసుకుంది టీమిండియా.

264 వర్సెస్​ శ్రీలంక

2014లో ఈడెన్​ గార్డెన్స్​లో జరిగిన మ్యాచ్ శ్రీలంకకు ఓ చేదు జ్ఞాపకం. వన్డేల్లో అత్యధిక వ్యక్తిగత స్కోరు 264 పరుగులు ఆ మ్యాచ్​లో శ్రీలంకపైనే చేశాడు రోహిత్​. 173 బంతుల్లో 264 పరుగులు చేసిన రోహిత్​... 33 ఫోర్లు, 9 సిక్సులతో అలరించాడు. ఈ మ్యాచ్​లో శ్రీలంక కనీస ప్రదర్శన చేయలేక 45 ఓవర్లలో 251 పరుగులకే ఆలౌటైంది.

208 వర్సెస్​ శ్రీలంక- 2017

2017లో శ్రీలంకపై మరోసారి విశ్వరూపాన్ని చూపాడు రోహిత్​ శర్మ. 153 బంతుల్లో 208 పరుగులతో రెచ్చిపోయి ఆడాడు. ఆ రోజు​ రోహిత్​ పెళ్లిరోజు కావడం విశేషం.

137 వర్సెస్​ బంగ్లాదేశ్​

2007 ప్రపంచకప్​లో భారత్​ను ఓడించిన బంగ్లాదేశ్​పై 2015 క్వార్టర్స్​లో ప్రతీకారం తీర్చుకున్నాడు రోహిత్. 2015 ప్రపంచకప్​ క్వార్టర్​ఫైనల్స్​ మ్యాచ్​లో 137 పరుగులతో బంగ్లా బౌలర్లకు చుక్కలు చూపించాడు.