దక్షిణాఫ్రికాతో టెస్టు సిరీస్లో అమీతుమీ తేల్చుకునేందుకు సిద్ధమవుతోంది టీమిండియా. రేపు (బుధవారం) విశాఖపట్టణం వేదికగా తొలి మ్యాచ్ జరగనుంది. ప్రాక్టీస్లో బిజీగా ఉన్న కోహ్లీసేన... సఫారీలపై గెలవాలని పట్టుదలతో ఉంది. ఇందులో భాగంగా జట్టులో మార్పులు చేసింది యాజమాన్యం. తుది జాబితాలో యువవికెట్ కీపర్ రిషబ్ పంత్కు బదులుగా వృద్ధిమాన్ సాహాకు అవకాశం లభించింది. దీనిపై తాజాగా స్పందించిన కోహ్లీ... మొదటి టెస్టులో సాహా ఆడతాడని స్పష్టం చేశాడు.
ఇటీవలే దక్షిణాఫ్రికాతో జరిగిన టీ20 సిరీస్లో ఘోరంగా విఫలమయ్యాడు పంత్. రెండు మ్యాచ్ల్లో వరుసగా 4, 19 పరుగులు చేసి నిరాశపర్చాడు. గత నెలలో జరిగిన వెస్టిండీస్ టెస్టు సిరీస్లోనూ స్థాయికి తగ్గట్లు ఆడలేకపోయాడు.
అనుభవమున్న జడేజా, అశ్విన్లు మొదటి టెస్టులో బరిలోకి దిగుతారని కోహ్లీ తెలిపాడు. స్టార్ బ్యాట్స్మెన్ రోహిత్ శర్మ ఓపెనర్గా ఇన్నింగ్స్ ప్రారంభిస్తాడని అన్నాడు.