'లిన్​ను​ వదులుకోవడం కోల్​కతా చేసిన తప్పిదం'

కోల్​కతా నైట్​రైడర్స్​ క్రిస్​ లిన్​ను వదులుకోవడం పెద్ద తప్పిదమని అన్నాడు టీమిండియా మాజీ ఆటగాడు యువరాజ్ సింగ్. అతడో గొప్ప ఆటగాడని ప్రశంసించాడు. ప్రస్తుతం లీగ్​ల్లో ఆడటాన్ని ఆస్వాదిస్తున్నానని తెలిపాడు.

వచ్చే ఏడాది జరగనున్న ఐపీఎల్ కోసం ఆటగాళ్ల బదిలీలు ముగిశాయి. ఇందులో భాగంగా కోల్​కతా నైట్ రైడర్స్​ ఓపెనర్ క్రిస్​ లిన్​ను వదులుకుంది. ఈ విషయంపై టీమిండియా మాజీ ఆటగాడు యువరాజ్ సింగ్ స్పందించాడు. ఆసీస్ ఆటగాడు లిన్​ను వదులుకోవడం కేకేఆర్ చేసిన అతిపెద్ద తప్పిదమని అభిప్రాయపడ్డాడు.

"అబుదాబి టీ10 లీగ్​లో లిన్ అదరగొట్టాడు. అద్భుతమైన షాట్స్ ఆడాడు. ఐపీఎల్ కేకేఆర్​ తరఫునా గొప్పగా రాణించాడు. కోల్​కతా నైట్​రైడర్స్​ అతడిని ఎందుకు అంటిపెట్టుకోలేదో అర్థం కావడం లేదు. ఇది ఓ పెద్ద తప్పిదం."​
-యువరాజ్ సింగ్, టీమిండియా మాజీ ఆటగాడు

క్రిస్​ లిన్​ కూడా అబుదాబి టీ10 లీగ్​లో యువరాజ్​ ఆడుతున్న మరాఠ అరేబియన్స్​ తరఫున బరిలో ఉన్నాడు. నిన్న జరిగిన మ్యాచ్​లో 30 బంతుల్లో 91 పరుగులు చేసి ఈ లీగ్​లో అత్యధిక వ్యక్తిగత స్కోరును నమోదు చేశాడు. ఇంతకుముందు ఈ రికార్డు ఇంగ్లాండ్ ఆటగాడు అలెక్స్ హేల్స్ (32 బంతుల్లో 87) పేరిట ఉండేది.

లీగ్​ల్లో ఆడటం సంతృప్తికరంగా ఉందన్న యువరాజ్​ ఐపీఎల్​ జట్టుకు కోచింగ్ విషయంలో ఇప్పుడే ఏమీ ఆలోచించట్లేదని తెలిపాడు.

"వచ్చే రెండు, మూడేళ్లలో చాలా లీగ్​లు జరగనున్నాయి. అందువల్ల వీటిలో ఆడటానికి ప్రయత్నిస్తా. ఏడాది మొత్తం ఆడటం కంటే రెండు, మూడు నెలలు ఆడటం నాకు బాగుంటుంది. వచ్చే కొన్నేళ్లు ఆటను ఆస్వాదిస్తా. అనంతరం కోచింగ్​ గురించి ఆలోచిస్తా."
-యువరాజ్ సింగ్, టీమిండియా మాజీ ఆటగాడు

ప్రపంచకప్​కు ముందు క్రికెట్​కు గుడ్​బై చెప్పిన యువరాజ్ సింగ్​ విదేశీ లీగుల్లో ఆడేందుకు మక్కువ చూపిస్తున్నాడు. ఇటీవలే కెనడా టీ20 లీగ్​లో పాల్గొన్న ఈ ఆటగాడు ప్రస్తుతం అబుదాబి టీ10 లీగ్​ ఆడుతున్నాడు.

ఇవీ చూడండి.. వ్యాఖ్యాతకు పార్థివ్ పంచ్​.. అదిరిపోలా..!