భారత అండర్-19 మాజీ క్రికెటర్ ఆత్మహత్య

భారత్ అండర్-19 మాజీ క్రికెటర్ సురేశ్ కుమార్ ఉరి వేసుకుని ఆత్మహత్య చేసుకున్నారు. ఈ విషయాన్ని కాంగ్రెస్ ఎంపీ శశి థరూర్ ట్వీట్ చేశారు.

రాహుల్ ద్రవిడ్ సహచర అండర్-19 క్రికెటర్ సురేశ్ కుమార్(47) ఆత్మహత్య చేసుకున్నారు. శుక్రవారం రాత్రి ఉరి వేసుకుని తనువు చాలించినట్లు పోలీసులు వెల్లడించారు. ఆయన దేహాన్ని కుమారుడు తొలుత గుర్తించారని, ఈ విషయమై దర్యాప్తు చేస్తున్నామని స్పష్టం చేశారు.

కేరళకు చెందిన సురేశ్ కుమార్.. 1991-92, 2005-06 మధ్య కాలంలో 72 ఫస్ట్ క్లాస్​ మ్యాచ్​లు ఆడారు. 1657 పరుగులతో పాటు 196 వికెట్లు తీశారు. కేరళ తరఫున 52 రంజీ మ్యాచ్​లు, రైల్వేస్ తరఫున 17 మ్యాచ్​లు ఆడారు. సౌత్ జోన్​, సెంట్రల్​ జోన్​ తరఫున దులీప్ ట్రోఫీలోనూ ప్రాతినిధ్యం వహించారు. 1992లో భారత్ అండర్-19 వన్డే, టెస్టు జట్లకు ఆడారు.