టీమ్‌ఇండియాతో తొలి టెస్టుకు ముందు ఆస్ట్రేలియాకు ఎదురుదెబ్బ తగిలింది. ఆ జట్టులో దాదాపుగా చోటు ఖాయమైన విల్ పుకోవ్స్కీ గాయపడ్డాడు. భారత యువ పేసర్ కార్తీక్ త్యాగి విసిరిన బంతి అతడి తలకు తగిలింది. దీంతో కాసేపు అతడు మైదానంలో కూలబడ్డాడు. ఆ తర్వాత ఒంటరిగా మైదానం వీడాడు. ఇదంతా భారత్ ఏ, ఆసీస్ ఏ మధ్య ప్రాక్టీస్ టెస్టు మ్యాచులో చోటుచేసుకుంది.
బోర్డర్‌-గావస్కర్‌ ట్రోఫీలో తొలి టెస్టు అడిలైడ్‌ వేదికగా డిసెంబర్‌ 17న ఆరంభం కానుంది. డే/నైట్‌లో గులాబి బంతితో ఇది జరుగుతుండటంతో రెండు జట్లు ప్రతిష్ఠాత్మకంగా తీసుకుంటున్నాయి. సుదీర్ఘ సిరీస్‌ కావడంతో బీసీసీఐ కోరిక మేరకు క్రికెట్‌ ఆస్ట్రేలియా రెండు ప్రాక్టీస్ మ్యాచులను ఏర్పాటు చేసింది. సిడ్నీ వేదికగా జరిగిన తొలి సాధనా మ్యాచ్ డ్రాగా ముగిసింది. అజింక్య రహానె శతకం బాదగా పుజారా, వృద్ధిమాన్‌ సాహా అర్ధశతకాలు సాధించారు. ఆసీస్‌లో గ్రీస్‌ శతకం అందుకున్నాడు.