దిగ్గజ సచిన్ తర్వాత పృథ్వీషాదే అక్కడ రికార్డు

కివీస్​తో రెండో టెస్టు ఆడుతున్న పృథ్వీషా.. అరుదైన రికార్డు నెలకొల్పాడు. దిగ్గజ సచిన్ తర్వాత ఆ ఘనత సాధించిన రెండో బ్యాట్స్​మన్​గా నిలిచాడు.

న్యూజిలాండ్​తో తొలి టెస్టులో విఫలమైన యువ ఓపెనర్ పృథ్వీషా.. రెండో టెస్టులో ఆకట్టుకున్నాడు. 54 పరుగులు చేసి అదరగొట్టాడు. అయితే మంచి జోరుమీదున్న సమయంలో, జెమీసన్ బౌలింగ్​లో క్యాచ్​ ఔట్​గా వెనుదిరిగాడు. ఈ క్రమంలోనే కివీస్​ గడ్డపై ఓ రికార్డును నెలకొల్పాడు.

న్యూజిలాండ్​లో ఆ దేశంపై టెస్టుల్లో అర్ధశతకం బాదిన రెండో పిన్న వయస్కుడిగా నిలిచాడు. ఈ జాబితాలో దిగ్గజ సచిన్ తెందుల్కర్ ముందున్నాడు. షా.. 20 సంవత్సరాల 112 రోజుల్లో చేయగా, సచిన్.. 16 సంవత్సరాల 291 రోజుల్లోనే ఈ ఘనత సాధించాడు.

టీమిండియా యువ ఓపెనర్ పృథ్వీషా

ఈ మ్యాచ్​లో తొలి రోజు ఆట ముగిసే సమయానికి కివీస్ 63/0తో నిలిచింది. అంతకు ముందు బ్యాటింగ్​ చేసిన కోహ్లీసేన.. 242 పరుగులకు ఆలౌటైంది. హనుమ విహారి(55) టాప్ స్కోరర్.