" పాక్​లో శ్రీలంక ఆడకపోవడానికి కారణం భారత్​"

పాకిస్థాన్​లో పర్యటనకు శ్రీలంక ఆటగాళ్లు అభ్యంతరం చెప్పడానికి కారణం భారత్ అని విమర్శించారు ఆ దేశ మంత్రి ఫవాద్ హుస్సేన్ చౌదరి. పాక్​లో ఆడితే ఐపీఎల్ కాంట్రాక్టులు రద్దు చేస్తామని భారత్ బెదిరించినట్లు ఆరోపించారు.

ఆర్టికల్ 370 రద్దు తర్వాత భారత్​పై వీలు చిక్కినప్పుడల్లా అక్కసు వెళ్లగక్కుతూనే ఉంది పాకిస్థాన్. తాజాగా పాక్​లో ఆడేందుకు పది మంది శ్రీలంక ఆటగాళ్లు అభ్యంతరం చెప్పగా.. ఇందుకు కారణం భారత్ అని విమర్శించారు ఆ దేశ మంత్రి ఫవాద్ హుస్సేన్ చౌదరి. తమ దేశంలో లంక ఆటగాళ్లు ఆడితే ఐపీఎల్ కాంట్రాక్టులను రద్దు చేస్తామని భారత్​ బెదిరించినట్లు ట్వీట్​ చేశారు.

"పాక్​లో ఆడకూడదని శ్రీలంక ఆటగాళ్లను భారత్ బెదిరించినట్లు కొంత మంది వ్యాఖ్యాతలు నాకు చెప్పారు. ఒకవేళ ఆడితే వారి ఐపీఎల్ కాంట్రాక్టులను రద్దు చేస్తామని భయపెట్టారని తెలిసింది. ఇది నిజంగా చవకబారుతనం. పక్షపాత బుద్ధితో భారత క్రీడావర్గాలు దారుణంగా ప్రవర్తించాయి"

-ఫవాద్ హుస్సేన్ చౌదరి, పాక్ సైన్స్ అండ్ టెక్నాలజీ మంత్రి.

పాకిస్థాన్​లో పర్యటించాలని నిర్ణయించుకున్న శ్రీలంకకు ఆ దేశ ఆటగాళ్లు షాకిచ్చారు. టీ-20 కెప్టెన్ మలింగ, మాజీ సారథి ఏంజెలో మ్యాథ్యూస్​ సహా పది మంది ఆటగాళ్లు దాయాది దేశంలో ఆడకూడదని నిర్ణయించుకున్నారు. భద్రతా కారణాల దృష్ట్యా సిరీస్​ నుంచి తప్పుకుంటున్నట్లు వెల్లడించారు. ఈ నెల 27 నుంచి ఇరు జట్ల మధ్య మూడు టీ-20లు, మూడు వన్డేలు జరగాల్సి ఉంది.

ఇదీ చదవండి: పాకిస్థాన్​లో ఆడేందుకు శ్రీలంక క్రికెటర్ల విముఖత