పాకిస్థాన్ చీఫ్ సెలక్టర్, హెడ్ కోచ్గా ఆ దేశ మాజీ క్రికెటర్ మిస్బా ఉల్ హఖ్ ఎంపికయ్యాడు. ఈ పదవిలో అతడు మూడేళ్లు కొనసాగనున్నట్లు పాకిస్థాన్ క్రికెట్ బోర్డు(పీసీబీ) తెలిపింది. బౌలింగ్ కోచ్గా వకార్ యూనిస్ బాధ్యతలు అప్పగించింది. మూడేళ్ల కాలానికి అతడితో ఒప్పందం చేసుకుంది.
"మాజీ సారథి మిస్బా ఉల్ హఖ్ను పాకిస్థాన్ హెడ్ కోచ్, చీఫ్ సెలక్టర్గా ఎంపిక చేస్తున్నాం. మూడేళ్ల పాటు బాధ్యతలు నిర్వర్తించనున్నాడు. అన్ని స్థాయిల్లో ఎంపిక చాలా పారదర్శకంగా జరిగింది" -పీసీబీ ప్రకటన
ఇప్పటివరకు కోచ్గా ఉన్న మిక్కీ ఆర్థర్ కాంట్రాక్ట్ను పీసీబీ పొడిగించలేదు. 2019 ప్రపంచకప్లో పాక్ సెమీస్ కూడా చేరకుండానే ఇంటిముఖం పట్టింది. ఈ కారణంగా బౌలింగ్ కోచ్ అజార్ మహ్మద్, బ్యాటింగ్ కోచ్ గ్రాంట్ ఫ్లవర్నూ వెనక్కిపంపింది పీసీబీ.
"పాకిస్థాన్ కోచ్గా నన్ను ఎంపికచేశారంటే.. నా మీద అంచనాలు కూడా అదే స్థాయిలో ఉంటాయి. అందుకు సిద్ధంగా ఉన్నా. ఒకవేళ వాటిని అందుకోలేకపోతే ఈ గౌరవానికి నా పేరును ప్రతిపాదించేవాడినే కాదు. ప్రతిభగల యువ క్రీడాకారులు చాలా మంది ఉన్నారు. వారిని ప్రోత్సహిస్తాను" - మిస్బా ఉల్ హఖ్,పాక్ మాజీ సారథి
స్వదేశంలో సెప్టెంబర్ 27 నుంచి శ్రీలంకతో టీ20లు ఆడనుంది పాకిస్థాన్. ఈ సిరీస్ నుంచే మిస్బా పాక్ 30వ కోచ్గా బాధ్యతలు తీసుకోనున్నాడు. నవంబరులో ఆస్ట్రేలియాలోనూ పర్యటించనుంది దాయాది జట్టు.
56 టెస్టుల్లో పాక్ జాతీయ జట్టుకు సారథ్యం వహించాడు మిస్బా. అందులో 27 విజయాలతో ఆ దేశం తరపున అత్యధిక మ్యాచ్లు గెలిపించిన టెస్టు కెప్టెన్గా రికార్డు సృష్టించాడు. 75 టెస్టులు, 162 వన్డేలు, 39 టీ ట్వంటీలకు ప్రాతినిధ్యం వహించిన మిస్బా 2017లో వీడ్కోలు పలికాడు.
ఇది చదవండి: స్కేటర్కు ఘోర ప్రమాదం తప్పింది.. లేదంటే..!
