అంతర్జాతీయ క్రికెట్లో తనదైన దూకుడుతో దూసుకెళ్తున్నాడు విరాట్ కోహ్లీ. ఇప్పటికే అత్యధిక శతకాలతో సచిన్ తర్వాత రెండో స్థానాన్ని కైవసం చేసుకున్నాడు. విశాఖ వేదికగా వెస్టిండీస్తో జరుగుతున్న రెండో వన్డేలో విరాట్ కోహ్లీ అరుదైన రికార్డు సాధించే అవకాశముంది.
సత్తాచాటితే కల్లిస్ రికార్డు బ్రేక్..
మరో 56 పరుగులు చేస్తే వన్డేల్లో అత్యధిక పరుగులు సాధించిన ఏడో బ్యాట్స్మన్గా రికార్డు సృష్టించనున్నాడు కోహ్లీ. 240 వన్డేల్లో 60.02 సగటుతో 11524 పరుగులు చేశాడు టీమిండియా సారథి. దక్షిణాఫ్రికా మాజీ క్రికెటర్ జాక్వస్ కలీస్ 328 మ్యాచ్ల్లో 11579 పరుగులతో ముందున్నాడు. ఈ మ్యాచ్లో కోహ్లీ సత్తాచాటితే కల్లిస్ రికార్డు బద్దలుకానుంది.
కోహ్లీకి కలిసొచ్చిన పిచ్..
విశాఖ పిచ్పై విరాట్ 139 సగటుతో బ్యాటింగ్ చేస్తూ అదరగొడుతున్నాడు. మొత్తం 556 పరుగులు చేశాడు. ఇందులో మూడు శతకాలు ఉన్నాయి. రెండు అర్ధశతకాలు(99, 65) ఉన్నాయి. ఈ ఏడాది మూడు ఫార్మాట్లలో కలిపి 2366 పరుగులు చేశాడు కోహ్లీ.
హ్యాట్రిక్ సాధించే అవకాశం..
గత రెండేళ్లుగా వన్డేల్లో లీడింగ్ రన్ స్కోరర్గా ఏడాదిని ముగిస్తున్నాడు కోహ్లీ. 2017లో 1460 పరుగులు చేసిన విరాట్.. తర్వాతి సంవత్సరం 1202 పరుగులు చేశాడు. ప్రస్తుతం విండీస్తో జరుగుతున్న వన్డే సిరీస్లో సత్తాచాటితే కోహ్లీ హ్యాట్రిక్ సాధించే అవకాశముంది.
రెండేళ్లుగా 50కు పైగా సగటు..
అంతేకాకుండా గత రెండేళ్లుగా మూడు ఫార్మాట్లలో 50కు పైగా సగటుతో బ్యాటింగ్ చేస్తున్న బ్యాట్స్మన్గా విరాట్ రికార్డు సృష్టించాడు. ప్రస్తుతం వన్డేల్లో కోహ్లీ సగటు 60.02 కాగా.. టెస్టుల్లో 54097, టీ20ల్లో 52.66 సగటుతో ఆకట్టుకుంటున్నాడు.
కోహ్లీ కాకుండా 50కు పైగా సగటుతో ఆడిన క్రికెటర్లు..
- మ్యాథ్యూహెడెన్(ఆస్ట్రేలియా)-2007
- ఆండ్రూ సైమండ్స్(ఆస్ట్రేలియా)- 2007
- కుమార సంగక్కర(శ్రీలంక)-2013
- స్టీవ్ స్మిత్(ఆస్ట్రేలియా)- 2016
- కేఎల్ రాహుల్(భారత్)- 2016
- ఏబీ డివిలియర్స్(దక్షిణాఫ్రికా)- 2017
ఆదివారం వెస్టిండీస్తో జరిగిన తొలి వన్డేలో భారత్ ఎనిమిది వికెట్ల తేడాతో ఓటమిపాలైంది. హెట్మయిర్‌ (139), హోప్‌ (102*) విండీస్ విజయంలో కీలక పాత్ర పోషించారు.
ఇదీ చదవండి: టాస్ గెలిచిన విండీస్.. భారత్ బ్యాటింగ్
