బోర్డర్-గావస్కర్ ట్రోఫీలో టీమ్ఇండియా బౌలర్లు మరోసారి ఆధిపత్యం కొనసాగిస్తారని భారత జట్టు ప్రధానకోచ్ రవిశాస్త్రి అభిప్రాయపడ్డాడు. 2018-19లో భారత పేసర్లు ఆసీస్ను దెబ్బతీసిన విధానాన్ని ఈ సందర్భంగా గుర్తుచేసుకున్నాడు.
నవంబరు 17 నుంచి జనవరి 19వరకు జరగనున్న పర్యటనలో ఇరుజట్లు మూడు వన్డేలు, మూడు టీ20లు, నాలుగు టెస్టులు ఆడనున్నాయి. తొలి టెస్టుకు ఇషాంత్ శర్మ అందుబాటులో లేకున్నా టీమ్ఇండియా బౌలింగ్ లైనప్ బలంగా ఉందని రవిశాస్త్రి ధీమా వ్యక్తం చేశాడు.
ఇషాంత్ లేకపోయినా..
"మాకు బ్రహ్మాండమైన బౌలింగ్ లైనప్ ఉంది. ఇషాంత్ లేకపోవడం ఫాస్ట్బౌలింగ్లో లోటుగా అనిపించినా.. దాన్ని భర్తీ చేయగల సామర్థ్యం ఉన్న యువ బౌలర్లు ఉన్నారు. ఈ అవకాశాన్ని యువ క్రికెటర్లు చేజిక్కించుకోవడం సహా తమ నైపుణ్యాన్ని నిరూపించుకునే వీలు కలుగుతుంది" అని రవిశాస్త్రి చెప్పాడు.
అందుబాటులో ఉన్న పేసర్లు
టీమ్ఇండియా బౌలింగ్ లైనప్లో సీనియర్లు జస్ప్రీత్ బుమ్రా, మహ్మద్ షమి, ఉమేశ్ యాదవ్లతో పాటు యువ బౌలర్లు నవదీప్ సైనీ, మహ్మద్ సిరాజ్లు ఉన్నారు. టెస్టుల్లో ఆడటానికి ఇషాంత్ శర్మ ఇంకా ఆస్ట్రేలియా బయలుదేరకపోవడం వల్ల అతడి రావడంపై అనుమానం వ్యక్తమవుతుంది. ఇషాంత్ ప్రస్తుతం బెంగళూరులోని జాతీయ క్రికెట్ అకాడమీలో పునరావాసంలో ఉన్నాడు. ఫిట్నెస్ పరీక్షల్లో నెగ్గిన తర్వాతే ఆస్ట్రేలియా బయలుదేరే అవకాశం ఉంది.
ఒకే మ్యాచ్ ఆడిన అనుభవం
నాలుగు టెస్టుల సిరీస్లో మొదటిది అడిలైడ్ వేదికగా జరగనుంది. ఇది డే/నైట్ విధానంలో జరగనుంది. "ఇదంతా మ్యాచ్ జరిగే మైదానాలపై ఆధారపడి ఉంటుంది. మనకు అనుభవం లేని పింక్-బాల్ మ్యాచ్తో సిరీస్ను ప్రారంభించనున్నాం. ఇప్పటివరకు మా జట్టు ఈ తరహాలో ఒక్క టెస్టు (కోల్కతాలో బంగ్లాదేశ్తో) మాత్రమే ఆడింది. కానీ, ఈ విషయంలో ఆస్ట్రేలియాకు చాలా వ్యత్యాసం ఉంది" అని రవిశాస్త్రి తెలిపాడు.
