పాకిస్థాన్తో రెండో టెస్టులో ఆస్ట్రేలియా కెప్టెన్ టిమ్పైన్ను దిగజార్చేలా స్టీవ్ స్మిత్ ప్రవర్తించాడని ఆ జట్టు మాజీ సారథి ఇయాన్ చాపెల్ వ్యాఖ్యలు చేసిన విషయం తెలిసిందే. తాజాగా ఈ విషయంపై స్మిత్ స్పందించాడు. తను కేవలం పైన్కు సాయం చేద్దామనే ఫీల్డింగ్ విషయంపై సలహాలిచ్చానని అన్నాడు.
"పైన్ తన బాధ్యతను అద్భుతంగా నిర్వర్తిస్తున్నాడు. నేను అతడికి సాయం చేద్దామనే ఫీల్డింగ్ విషయంలో సలహాలిచ్చా. జట్టు బాగు కోసమే అలా చేశా. అతడిని అణగదొక్కాలనో, దిగజార్చాలనో అలా ప్రవర్తించలేదు" - స్టీవ్ స్మిత్, ఆసీస్ క్రికెటర్.
పాక్తో టెస్టులో స్మిత్.. ఆఫ్ సైడ్ ఫీల్డర్లు సెట్ చేశాడని, అందుకు సంబంధించి టిమ్పైన్తో సంభాషించాడని చాపెల్ మ్యాచ్ అనంతరం అన్నాడు. పైన్ను దిగజార్చేలా స్మిత్ ప్రవర్తిస్తున్నాడని, ఫీల్డింగ్ సెట్ చేస్తూ మైదానం మధ్యలో నడుచుకుంటూ వెళ్లడం తనకు నచ్చలేదని తెలిపాడు.
అడిలైడ్ వేదికగా పాకిస్థాన్తో జరిగిన ఈ మ్యాచ్లో ఆస్ట్రేలియా.. ఇన్నింగ్స్ 48 పరుగుల తేడాతో విజయం సాధించింది. రెండు టెస్టుల సిరీస్ను 2-0 తేడాతో క్లీన్ స్వీప్ చేసింది. డేవిడ్ వార్నర్.. తొలి టెస్టులో శతకంతో పాటు.. రెండో టెస్టులో ట్రిపుల్ సెంచరీ చేసి మ్యాన్ ఆఫ్ ద సిరీస్ దక్కించుకున్నాడు.
ఇదీ చదవండి: ఆర్చర్ నేర్చుకోవాల్సింది చాలా ఉంది: రూట్
