అంతర్జాతీయ క్రికెట్లో తెలుగు క్రికెటర్లకు అన్యాయం జరుగుతుందని.. గతంలో లక్ష్మణ్, తాజాగా రాయుడుకు ప్రపంచకప్ జట్టులో చోటు దక్కకపోవడమే ఇందుకు నిదర్శనమని పలువురు ఆరోపిస్తున్నారు. తాజాగా భారత మాజీ ఆటగాడు ప్రజ్ఞాన్ ఓజా సైతం రాయుడు బాధను అర్థం చేసుకోగలను అంటూ ట్వీట్ చేయటం ఈ వాదనకు మరింత బలం చేకూరుస్తోంది.
"హైదరాబాదీ క్రికెటర్ల పరిస్థితి ఇంతే. ఇలాంటి గడ్డు కాలాన్ని నేనూ ఎదుర్కొన్నా. నీ బాధను అర్థం చేసుకోగలను" అంటూ రాయుడుకు మద్దతుగా ట్వీట్ చేశాడు ఓజా.
రాయుడు కంటే విజయ్‌ శంకర్ 3 రకాలుగా ఉపయోగపడతాడంటూ ఎమ్మెస్కే చేసిన ట్వీట్కు అంబటి వ్యంగ్యంగా తన ఆవేదన వ్యక్తం చేశాడు. ఈ ట్వీట్‌పై బీసీసీఐ స్పందిస్తూ.. రాయుడు బాధను అర్థం చేసుకోగలమని, అతనిపై ఎలాంటి చర్యలు తీసుకోమని తెలిపింది. అయితే తాజాగా ఓజా.. ఇది అంబటి ఒక్కడిదే కాదు తెలుగు ఆటగాళ్ల పరిస్థితి ఇంతే అంటూ ట్వీట్ చేయడం చర్చనీయాంశమైంది.
లెఫ్టార్మ్‌ స్పిన్నర్‌ అయిన ఓజాకు.. టెస్ట్‌ కెరీర్లో మంచి రికార్డు ఉంది. అయితే.. భారత జట్టు తరఫున సుదీర్ఘ కాలం ఆడలేకపోయాడీ హైదరాబాదీ క్రికెటర్. ఈ విషయాన్నే గుర్తు చేస్తూ ఓజా సెలక్షన్‌ ప్యానెల్‌పై పరోక్ష వ్యాఖ్యలు చేశాడు. సచిన్ ఆడిన చివరి (200వ) టెస్టు మ్యాచ్లో ఓజా 10 వికెట్లు పడగొట్టి మ్యాన్‌ ఆఫ్‌ ది మ్యాచ్ అందుకున్నాడు. మొత్తం 24 టెస్టుల్లో 113 వికెట్లు తీసి ఆకట్టుకున్నాడు.