ఆ రికార్డు సాధించిన ఏకైక క్రికెటర్​గా టేలర్

భారత్-న్యూజిలాండ్​ మధ్య జరుగుతోన్న తొలి టెస్టు ద్వారా ఓ రికార్డును నెలకొల్పాడు కివీస్ ఆటగాడు రాస్ టేలర్. అన్ని ఫార్మాట్లలో వంద మ్యాచ్​లు ఆడిన ఏకైక క్రికెటర్​గా నిలిచాడు.

న్యూజిలాండ్ సీనియర్ క్రికెటర్ రాస్ టేలర్ అరుదైన ఘనత సాధించాడు. భారత్​తో జరుగుతోన్న తొలి టెస్టు ఇతడికి 100వది. ఈ మ్యాచ్​ ద్వారా అన్ని ఫార్మాట్లలో వంద మ్యాచ్​లు ఆడిన ఏకైక ఆటగాడిగా రికార్డు సృష్టించాడు. ఇంతకుముందు ఏ క్రికెటర్ ఈ ఘనత సాధించలేదు.

న్యూజిలాండ్ తరఫున వంద టెస్టులాడిన నాలుగో క్రికెటర్ టేలర్. ఇంతకుముందు డేనియల్ వెటోరీ (112), ఫ్లెమింగ్ (111), బ్రెండన్ మెక్​కలమ్ (101) ఈ ఘనత సాధించారు. అలాగే కివీస్ తరఫున టెస్టుల్లో అత్యధిక సెంచరీలు (19) చేసిన రెండో క్రికెటర్​గా కొనసాగుతున్నాడు. ఆ జట్టు ప్రస్తుత సారథి విలియమ్సన్ 21 శతకాలతో ముందున్నాడు.

ఇటీవలే టీ20ల్లోనూ వంద మ్యాచ్​లను పూర్తి చేసుకున్న ఆటగాడిగా నిలిచాడు టేలర్. అలాగే న్యూజిలాండ్ తరఫున వన్డే, టెస్టుల్లో అత్యధిక పరుగులు సాధించిన ఆటగాడిగానూ కొనసాగుతున్నాడు. ఇప్పటివరకు టెస్టుల్లో 7,174, వన్డేల్లో 8,570 పరుగులు చేశాడు.