ఆక్లాండ్ వేదికగా జరిగిన తొలి టీ20లో టీమిండియా 6 తేడాతో ఘనవిజయం సాధించింది. న్యూజిలాండ్ నిర్దేశించిన 204 పరుగుల భారీ లక్ష్యాన్ని, 19 ఓవర్లలోనే ఛేదించి, ఐదు టీ20ల సిరీస్లో 1-0 ఆధిక్యంలో నిలిచింది.
204 పరుగుల భారీ లక్ష్యంతో బరిలోకి దిగిన టీమిండియా ప్రారంభం నుంచి దాటిగానే ఆడింది. ఓపెనర్ రోహిత్ శర్మ 7 పరుగులకే ఔటైనా.. కోహ్లీ, రాహుల్ స్కోరు బోర్డును పరుగులు పెట్టించారు. ఈ క్రమంలో రాహుల్ అర్ధసెంచరీ పూర్తి చేసుకున్నాడు. అనంతరం 56 పరుగులు చేసి వెనుదిరిగాడు. తర్వాత కోహ్లీ.. 45 పరుగులు చేసి పెవిలియన్ చేరాడు. శివం దూబే (13) నిరాశపర్చాడు. ఫలితంగా మ్యాచ్ అదుపుతప్పింది. కానీ యువ బ్యాట్స్మన్ శ్రేయస్ అయ్యర్ చివరి వరకు నిలిచి, ఒంటి చేత్తో మ్యాచ్ను గెలిపించాడు.
భళా శ్రేయస్
ఛేదనలో 142 పరుగులకే 4 వికెట్లు కోల్పోయింది భారత్. ప్రధాన బ్యాట్స్మెన్ ఔటయ్యారు. యువ బ్యాట్స్మెన్ శ్రేయస్ అయ్యర్, మనీశ్ పాండేలపై భారం పడింది. మనీశ్ మాత్రం శ్రేయస్కు స్ట్రైకింగ్ ఇస్తూ 14 పరుగులతో నాటౌట్గా నిలిచాడు. కానీ శ్రేయస్ ఆటతీరు మాత్రం అద్భుతం. తీవ్ర ఒత్తిడిలోనూ భారీ షాట్లు ఆడూతూ జట్టును ఆదుకున్నాడు. కేవలం 29 బంతుల్లోనే 5 ఫోర్లు, 3 సిక్సులతో 58 పరుగుల చేశాడు. ఫలితంగా టీమిండియా 19 ఓవర్లలో లక్ష్యాన్ని ఛేదించింది.
కివీస్ ధనాధన్
టాస్ ఓడి మొదట బ్యాటింగ్కు దిగిన న్యూజిలాండ్.. నిర్ణీత 20 ఓవర్లో 5 వికెట్ల నష్టానికి 203 పరుగులు చేసింది. ఓపెనర్లు శుభారంభానిచ్చారు. తొలి వికెట్కు మున్రో-గప్తిల్.. 80 పరుగుల భాగస్వామ్యం నెలకొల్పారు. అనంతరం గప్తిల్ (30) పెవిలియన్ చేరాడు. బౌండరీ లైన్ వద్ద రోహిత్ పట్టిన ఇతడి క్యాచ్ మ్యాచ్కే హైలెట్గా నిలిచింది. మున్రో మాత్రం ఎడాపెడా బౌండరీలతో విరుచుకుపడ్డాడు. 42 బంతుల్లో 59 పరుగులు చేసి ఔటయ్యాడు. గ్రాండ్హోమ్ (0) వెంటనే వెనుదిరిగాడు.
అనంతరం సారథి విలియమ్సన్, టేలర్ భారత బౌలర్లపై ఎదురుదాడికి దిగారు. ఈ క్రమంలో విలియమ్సన్ అర్ధసెంచరీని పూర్తి చేసుకున్నాడు. అనంతరం 51 పరుగుల వద్ద చాహల్ బౌలింగ్లో ఔటయ్యాడు. టేలర్ కూడా హాఫ్ సెంచరీతో ఆకట్టుకున్నాడు. 54 పరుగులతో నాటౌట్గా నిలిచాడు. ఫలితంగా కివీస్ నిర్ణీత 20 ఓవర్లలో 203 పరుగులు చేసింది. భారత బౌలర్లలో బుమ్రా, చాహల్, దూబే, ఠాకుర్, జడేజా తలో వికెట్ తీశారు.
