మహేంద్రసింగ్ ధోనీ మళ్లీ జట్టులోకి రావాలని అభిమానులు ఆశిస్తున్నారు. ఎప్పుడెప్పుడు మైదానంలో అడుగుపెడతాడా అని చూస్తున్నారు. ఈనెలలో ఐపీఎల్ ప్రారంభం కావాల్సి ఉండగా అందుకోసం అప్పుడే ప్రాక్టీస్ మొదలుపెట్టాడు మహీ. ఈ వీడియోలు సామాజిక మాధ్యమాల్లో వైరల్ అవుతున్నాయి. అయితే ఈ ఐపీఎల్లో ప్రదర్శనే అతడు మళ్లీ జట్టులోకి రావడానికి ఉపయోగపడతుందని కొత్తగా నియామకమైన సెలక్షక కమీటీ తెలిపింది.
టీమిండియాకు కొత్త సెలక్షన్ కమిటీ ఛైర్మన్గా ఎన్నికైన సునీల్ జోషి నాయకత్వంలో తొలిసారి కమిటీ సమావేశమైంది. దక్షిణాఫ్రికాతో జరిగే మూడు వన్డేల సిరీస్కు జట్టును ఎంపిక చేసింది. ఈ సందర్భంలో ధోనీ భవితవ్యంపైనా స్పష్టతనిచ్చాడు జోషి.
"దక్షిణాఫ్రికాతో వన్డే సిరీస్కు ధోనీని పరిగణలోకి తీసుకోలేదు. ఐపీఎల్లో మంచి ప్రదర్శన చేస్తేనే అతడిని జట్టులోకి తీసుకుంటాం. ధోనీనే కాదు ఇంకా చాలా మంది సీనియర్, జూనియర్ క్రికెటర్లు ఐపీఎల్లో పాల్గొంటున్నారు. మంచి ప్రదర్శన చేస్తే వారు కూడా జట్టులోకి వస్తారు. కొన్ని ఆశ్చర్యకరమైన నిర్ణయాలూ ఉండొచ్చు. " '
-సునీల్ జోషి, టీమిండియా సెలక్షన్ కమిటీ ఛైర్మన్
ఈ ఏడాది అక్టోబర్లో ఆస్ట్రేలియా వేదికగా టీ20 ప్రపంచకప్ ప్రారంభంకానుంది. ఇందుకోసం ఇప్పటికే జట్టును సన్నద్ధం చేస్తోంది సెలక్షన్ కమిటీ. కొత్త కుర్రాళ్లకు ఎక్కువ అవకాశాలివ్వాలని భావిస్తోంది. అయితే ఐపీఎల్లో మంచి ప్రదర్శన చేసిన ఆటగాళ్లనూ పరిగణలోకి తీసుకుంటామని సెలక్షన్ కమిటీ చెప్పినందున.. ఎవరు అవకాశం దక్కించుకుంటారో అని ఆత్రుతగా ఎదురుచూస్తున్నారు అభిమానులు.
