ఆ బక్కపల్చని జులపాల జుట్టు కుర్రాడు పాక్‌ బౌలర్లను చీల్చి చెండాడిన విధానం ఇంకా కళ్ల ముందే కదలాడుతోంది. యువకులతో దక్షిణాఫ్రికాకు వెళ్లి తొలి టీ20 ప్రపంచకప్‌ ముద్దాడింది ఈ మధ్యే కదా! సొంతగడ్డ మీద శ్రీలంకపై ఫైనల్లో 91 నాటౌట్‌తో చెలరేగి 28 ఏళ్ల వన్డే ప్రపంచకప్‌ కల నిజంచేసి మరీ ఎక్కువ రోజులేం కాలేదు. టెస్టుల్లో టీమిండియాను అగ్రస్థానానికి చేర్చింది మొన్ననే కదా! రెండు ఆసియా కప్‌లు, ఓ ఛాంపియన్స్‌ ట్రోఫీ అందుకొని అభిమానులను మురిపించి ఎక్కువ కాలం ఏం కాలేదు!
కానీ.. ఏంటో అప్పుడే ఎంఎస్ ధోనీ అంతర్జాతీయ క్రికెట్కు వీడ్కోలు పలికేశాడు! తరచి చూస్తే అతడు అంతర్జాతీయ క్రికెట్‌లోకి రంగప్రవేశం చేసి అప్పుడే 16 ఏళ్లు దాటింది. ఎన్ని ఘనతలు పొందినా ఎంత ఎత్తుకు ఎదిగినా ఏదో ఓ రోజు చేస్తున్న పనికి శాశ్వత విరామం ప్రకటించాల్సిందే కదా. అభిమానులకు కొంత నిరాశ తప్పదు. ఇదే దశను సచిన్‌, క్లైవ్‌లాయిడ్‌, మారడోనా, పీలే, మార్టినా నవత్రిలోవా తదితర క్రీడాకారులకూ తప్పలేదు. ఇప్పుడు ధోనీకీ తప్పలేదు. ఆటగాడిగా, సారథిగా మిస్టర్‌ కూల్‌ కెరీర్‌లో ఎన్నో ఎత్తుపల్లాలు చవిచూశాడు. ఒక్కసారి ఆ కాల గమనంలోకి పరుగులు తీద్దాం! అతడి ఉనికిని కళ్లల్లో నింపుకొందాం.
వరుస శతకాలు (2004, ఆగస్టు 16, 19)
భారత్‌-ఏ తరఫున పాక్‌-ఏపై వరుస శతకాలతో ధోనీ చెలరేగాడు. ముక్కోణపు సిరీస్‌ ఫైనల్‌కు చేర్చి మ్యాన్‌ ఆఫ్ ది సిరీస్‌గా నిలిచాడు.
అరంగేట్రంలో డకౌట్‌ (2004, డిసెంబర్‌ 23)
అంతర్జాతీయ క్రికెట్‌లోకి అరంగేట్రం చేశాడు. చిట్టగాంగ్‌లో బంగ్లాదేశ్‌పై తొలి వన్డేలోనే డకౌట్‌ అయ్యాడు. రనౌట్‌గా వెనుదిరిగాడు. మూడు మ్యాచ్‌లో సిరీస్‌లో మొత్తం 19 పరుగులే చేశాడు.
దక్కని చోటు (2005, ఫిబ్రవరి 8)
ఛాలెంజర్స్‌ సిరీస్‌లో భారత్‌-బీ సీనియర్స్‌ తరఫున 96 బంతుల్లోనే 102* పరుగులు చేశాడు. అయినప్పటికీ పాక్‌పై ఆ తర్వాత జరిగిన టెస్టు సిరీస్‌కు మహీ ఎంపిక కాలేదు. దినేశ్‌ కార్తీక్‌ వైపే సెలక్టర్లు మొగ్గు చూపారు.
మార్మోగిన పేరు (2005, ఏప్రిల్‌ 5)
సొంత దేశంలో పాక్‌తో వన్డే సిరీస్‌కు ఎంపికయ్యాడు. గంగూలీ ఆదేశాల మేరకు మూడో స్థానంలో క్రీజులోకి వచ్చాడు. 123 బంతుల్లోనే 148 పరుగులు చేసి అభిమానులను ఉర్రూతలూగించాడు. ద్రవిడ్‌ తర్వాత శతకం బాదిన తొలి వికెట్‌ కీపర్‌గా రికార్డు సృష్టించాడు. అతడి స్కోరుతో భారత్‌ 356 పరుగులు చేసింది. మ్యాచ్‌ గెలిచి సిరీస్‌లో 2-0తో ఆధిక్యంలో నిలిచింది.
ఆనందం రెట్టింపు (2005, అక్టోబర్‌ 31)
వన్డే జట్టులో స్థానం సుస్థిరం చేసుకున్నాడు. జైపుర్‌లో శ్రీలంకపై ఛేదనలో 10 సిక్సర్లు, 16 ఫోర్లతో 145 బంతుల్లోనే 183 పరుగులతో అజేయంగా నిలిచాడు. వికెట్‌ కీపర్‌గా అత్యధిక స్కోరు సాధించాడు. సిరీస్‌లో జట్టుకు 3-0తో ఆధిక్యం అందించాడు. చివరి ఈ సిరీస్‌ను టీమిండియా 6-1తో కైవసం చేసుకుంది. ధోనీ మ్యాన్‌ ఆఫ్ ది సిరీస్‌గా ఎంపికయ్యాడు.
టెస్టుల్లో అరంగేట్రం (2005, డిసెంబర్‌ 2)
చెన్నైలో శ్రీలంకపై టెస్టుల్లో అరంగేట్రం చేశాడు. వర్షంతో ఆగిపోయిన మ్యాచ్‌లో 31 పరుగులు చేశాడు.
ఆదిలోనే ఎదుగుదల (2005, డిసెంబర్‌ 12)
శ్రీలంకపై 51 బంతుల్లో 51 చేసి టెస్టుల్లో తొలి అర్ధశతకం అందుకున్నాడు. యువీతో కలిసి ఏడో వికెట్‌కు 104 పరుగుల భాగస్వామ్యం అందించాడు.
షాట్లకు ఫిదా (2006, జనవరి 23-24)
టెస్టుల్లో తొలి శతకం సాధించాడు. ఫైసలాబాద్‌లో పాక్‌ తొలి ఇన్నింగ్స్‌లో 588 పరుగులు చేసింది. బ్యాటింగ్‌కు దిగిన టీమిండియా 281/5తో ఉన్న వేళ ఈ శతకం అందుకోవడం గమనార్హం. షోయబ్‌ అక్తర్‌ బౌలింగ్‌ను అడ్డుకొని మరిచిపోలేని హుక్‌షాట్లతో 153 బంతుల్లో 148 చేశాడు. భారత్‌ 15 పరుగుల ఆధిక్యం అందించాడు.
షినిషర్‌ అవతారం (2006, ఫిబ్రవరి 6, 13, 19)
పాక్‌పై వన్డేల్లో అద్భుతమైన ఫామ్‌ కొనసాగిస్తూ ఫినిషర్‌గా ముద్ర వేయడం మొదలుపెట్టాడు. ఐదు మ్యాచ్‌ల సిరీస్‌లో 53 బంతుల్లో 68, 46 బంతుల్లో 72, 56 బంతుల్లో 77తో ఆకట్టుకున్నాడు. ఈ సిరీస్‌ను టీమిండియా 4-1తో నెగ్గింది.
ప్రపంచ నంబర్‌-1 (2006, ఏప్రిల్‌ 20)
42 మ్యాచుల తర్వాత 52కు పైగా సగటు, 103 స్ట్రైక్‌రేట్‌తో వన్డేల్లో నంబర్‌-1 బ్యాట్స్‌మన్‌గా ఎదిగాడు. రికీ పాంటింగ్‌ను వెనక్కి నెట్టాడు.
ఒంటరి పోరాటం (2007, మే 10)
ప్రపంచకప్‌లో మరోసారి టీమిండియా పరువు పోకుండా అడ్డుకున్నాడు. బంగ్లాదేశ్‌పై 250 పరుగుల ఛేదనలో భారత్‌ 63కే 3 వికెట్లు కోల్పోయింది. ఈ క్రమంలో 106 బంతుల్లో 91 పరుగులు చేసి ఆదుకున్నాడు. ఒంటరి పోరాటం చేశాడు.
కాపాడాడు (2007, జులై 23)
చక్కని ఇన్నింగ్స్‌తో లార్డ్స్‌ టెస్టులో పరువు నిలిపాడు. తొలి టెస్టులో 380 పరుగుల ఛేదనలో ఆఖరి రోజు భారత్‌ 145/5తో కష్టాల్లో పడింది. తనదైన రీతిలో ధోనీ నిలకడగా ఆడాడు. మూడు గంటలకు పైగా క్రీజులో నిలిచాడు. 159 బంతులాడి 76 పరుగులతో అజేయంగా నిలిచాడు. వర్షం మ్యాచ్‌ ముందుగానే ముగిసే వరకు కుదురుగా బ్యాటింగ్‌ చేశాడు. భారత్‌ను 282/9తో కాపాడాడు. ఆ తర్వాత టీమిండియా 1-0తో సిరీస్‌ గెలిచింది.
పగ్గాలు (2007, ఆగస్టు 7)
ఐసీసీ టీ20 ప్రపంచకప్‌నకు జట్టు సారథిగా ఎంపికయ్యాడు. ఈ ట్రోఫీకి సచిన్‌, ద్రవిడ్‌, గంగూలీ దూరంగా ఉన్నారు!
ఎదుగుదల (2007, సెప్టెంబర్‌ 18)
సారథ్యానికి రాహుల్‌ ద్రవిడ్‌ గుడ్‌బై చెప్పడంతో ధోనీ వన్డే పగ్గాలు అందుకున్నాడు.
ఏడాదిలోపే విశ్వవిజేత (2007, సెప్టెంబర్‌ 24)
ఆశాల్లేకుండా, అంచనాలు లేకుండా దక్షిణాఫ్రికా వెళ్లాడు. ఐసీసీ టీ20 ప్రపంచకప్‌ను అందించి సారథిగా ప్రశంసలు పొందాడు. మళ్లీ భారత క్రికెట్కు ఊపిరి పోశాడు!
ఆధిపత్యం మొదలు (2008, ఫిబ్రవరి-మార్చి)
సీబీ సిరీస్‌కు గంగూలీ, ద్రవిడ్‌ను ఎంపిక చేయకపోవడంతో వచ్చిన తీవ్ర విమర్శల్ని ఎదుర్కోన్నాడు. తొలిసారి టీమిండియా ఆసీస్‌తో ముక్కోణపు సిరీస్‌ను 2-0తో గెలవడంతో విమర్శలకు విలువ లేకుండా పోయింది.
టెస్టు సారథ్యం (2008, ఏప్రిల్‌ 11-13)
అనిల్‌ కుంబ్లే లేకపోవడంతో టెస్టు పగ్గాలు తీసుకున్నాడు. కాన్పూర్‌లో మూడు రోజుల్లోనే దక్షిణాఫ్రికాను ఓడించాడు. సిరీస్‌ను 1-1తో సమం చేశాడు.
టెస్టుల్లో నంబర్‌ 1 (2009-డిసెంబర్‌ 6)